Pinuri ni Senador Camille Villar nitong Huwebes, Agosto 7, ang tapang at dedikasyon ng mga tauhan ng Bureau of Fire Protection – National Capital Region (BFP-NCR), at hinikayat silang ipagpatuloy ang kanilang mahalagang misyon na magligtas ng buhay at magprotekta ng mga komunidad.
Sa kaniyang talumpati sa pagdiriwang ng ika-34 na Anibersaryo ng BFP-NCR, pinarangalan ni Villar ang mga bumbero sa kanilang walang sawang paglilingkod, kahit pa humaharap sa matinding panganib. Inihalintulad niya ang kanilang papel sa “apoy ng malasakit, liwanag ng serbisyo, at haligi ng kaligtasan” para sa bawat Pilipino.
“Ang pagdiriwang na ito ay hindi lamang tungkol sa paglingon sa nakaraan,” ani Villar sa mga bumberong dumalo. “Ito rin ay tungkol sa pagtanaw sa hinaharap — isang panawagan na ipagpatuloy ang inyong nasimulan: na maging apoy ng malasakit, liwanag ng serbisyo, at haligi ng kaligtasan para sa bawat Pilipino.”
Binigyang-diin ni Villar ang panganib na kaakibat ng pagiging bumbero at kinilala na ang mga kasapi ng BFP ay higit pa sa mga tagapuksa ng apoy — sila ay mga tagapagtanggol ng buhay, unang tumutugon sa oras ng sakuna, at tagapagdala ng pag-asa sa gitna ng panganib.
“Ang inyong presensya sa bawat barangay, sa bawat lungsod, at sa bawat tahanang inyong naililigtas ay patunay na ang BFP ay isang buhay na simbolo ng malasakit at katapangan,” wika niya.
'Speech' ng mga politiko tuwing bahagian ng ayuda, ekis na—PBBM
Sa temang “Apoy ng Serbisyong Kapital” ngayong taon, binati ni Villar ang BFP-NCR sa kanilang mahalagang yugto at pinuri ang mga pinarangalan para sa natatanging serbisyo. Ipinahayag din niya ang paghanga sa matatag na paninindigan ng mga bumbero, kahit pa isugal ang sariling buhay.
“Sa inyong paggunita ng 34 na taon ng tapat na paglilingkod, hinihikayat ko kayong panatilihin ang apoy — maglingkod nang may sigasig at magligtas ng buhay nang may parehong alab na palaging nagbibigay-kahulugan sa BFP,” ani Villar.
