Hindi na bago ang makakita ng kambal sa iisang unibersidad, ngunit kakaiba ang kuwento nina Lance Matthew Fariñas at Hans Joshua Fariñas—magkapatid na kambal na hindi lamang magkamukha kundi magkatulad ding namayagpag sa akademya.
Ngayong taon, sabay silang nagtapos bilang summa cum laude sa degree program na Bachelor of Science in Biology sa University of the Philippines Diliman sa Quezon City.
Proud na inanunsyo ng UP Institute of Biology sa kanilang Facebook page ang karangalang dala ng kanilang mga tinaguriang “Wonder Twins.” Bukod sa parehong pinakamataas na parangal ang kanilang natanggap sa pagtatapos, nag-uwi rin sila ng kani-kaniyang pagkilala mula sa kolehiyo at institusyon.
Si Hans Joshua ang kinilalang Most Outstanding BS Biology Graduate at tumanggap ng Academic Excellence Award mula sa Institute of Biology, pati na rin ng College of Science Excellence Award para sa natatanging estudyante sa larangan ng Biology.
ALAMIN: ‘Required’ ba na magbigay ng 13th Month Pay ang mga kompanya tuwing Holiday Season?
Samantala, si Lance Matthew naman ay pinuri sa larangan ng pananaliksik, matapos tanghalin bilang Best Undergraduate Thesis Awardee ng Institute of Biology, at ginawaran din ng Best Undergraduate Thesis in Biology Award ng College of Science.
Bagama’t magkamukha at magkaboses, pinatunayan ng kambal na hindi hadlang ang pagiging magkatulad sa pagkakaroon ng sariling landas tungo sa tagumpay. Ang kanilang dedikasyon at husay ay sumasalamin sa mataas na pamantayan ng kahusayan na isinusulong ng Institute of Biology.
Isang tunay na inspirasyon sina Lance at Hans—hindi lamang sa mga kapwa estudyante, kundi sa buong komunidad ng agham pangkalikasan sa bansa.
