Sa likod ng bawat ngiti ng isang mag-aaral ay maaaring nakatago ang mga suliraning hindi basta-basta nababanggit—mga pasaning pilit binabalewala, gaya ng kakapusan sa baon o ang unti-unting paglaho ng gana sa pag-aaral.
Sa isang mundong puno ng inaasahan at kompetisyon, hindi biro ang maging estudyante. Marami ang gumigising araw-araw na bitbit ang pangarap, ngunit kulang sa pamasahe o pagkain.
May ilan ding nakaupo sa silid-aralan, ngunit ang isip ay malayo—gapos ng pagod, pag-aalala, o kawalang motibasyon. Sa sanaysay na ito, sisilipin natin ang mga hamong kinahaharap ng kabataang dapat sana’y inspiradong matuto, ngunit madalas ay nalulunod sa tahimik na laban ng kanilang araw-araw.
Ngunit ang ilang mga mag-aaral sa Mindanao, tila ibang klase ang kanilang pinoproblema. Literal na buwis-buhay.
ALAMIN: Gaano katagal bago mapanis mga hinandang pagkain noong holiday?
Nagpabagbag sa kalooban ng mga netizen ang isang viral video mula sa Midsalip, Zamboanga Del Sur kung saan mapapanood ang ilang mga mag-aaral na lumalangoy sa ilog at nilalabanan ang rumaragasang agos nito para lamang makapasok sa kanilang paaralan.
Sa kuhang video ng netizen na si Gideon Goc-Ong na iniulat sa "State of the Nation" ng GTV, makikita ang ilang mga mag-aaral na nakalusong sa maputik na ilog na may malakas na agos dahil sa malakas na pag-ulan. Mapapansing habang tinatawid nila ang ilog, nakataas ang kanilang mga dalang gamit upang hindi mabasa.
Makikita rin sa video ang ilan pang mga mag-aaral na tinutulungan ang iba pang mas maliliit na kasama upang makatawid sa ilog.
Ayon sa ulat, ganito raw lagi ang senaryo sa pagpasok at pag-uwi mula sa kanilang paaralan.
Tinatalakay na raw ng lokal na pamahalaan ang kanilang gagawin para masolusyunan ito.
