Itinalaga si Mikee Cojuangco-Jaworski bilang bagong Chair ng Coordination Commission ng International Olympic Committee (IOC) para sa 2032 Summer Olympics o "Brisbane 2032" ayon sa opisyal na anunsyong inilabas ng IOC sa kanilang X account.

Si Cojuangco-Jaworski, isang kilalang personalidad sa larangan ng palakasan at kasalukuyang miyembro ng IOC mula pa noong 2013, ang kauna-unahang Pilipina na gaganap bilang tagapangulo ng isang coordination commission para sa Olympic Games.

Ang Coordination Commission ang pangunahing katawan ng IOC na nakatutok sa pagsubaybay at paggabay sa paghahanda ng host city para sa Olympics.

Bahagi ng mandato ng komisyon ang pakikipag-ugnayan sa lokal na organizing committee upang matiyak na naaayon sa pandaigdigang pamantayan ang mga isinasagawang paghahanda para sa naturang pandaigdigang paligsahan.

Amang OFW ng nasawing 5-anyos sa NAIA, 'di nakaalis ng bansa; DMW, makikipagtulungan sa employer

Bukod sa kaniyang posisyon sa IOC, si Cojuangco-Jaworski ay isang dating equestrian champion na nanalo ng gintong medalya sa Asian Games noong 2002, at matagal nang aktibong tagapagtaguyod ng sports development sa Pilipinas at sa buong rehiyon.

Inaasahang magiging mahalaga ang papel ng kaniyang pamumuno sa paghubog ng Brisbane 2032 bilang isang makabago, responsable, at inspirasyonal na Olympic Games para sa bagong henerasyon ng mga atleta at tagasuporta ng palakasan sa buong mundo.