Pinahintulutan ng Malacañang ang ilang mga opisyal ng gobyerno na bumisita sa Taiwan para sa mga layuning pang-ekonomiya at pangkalakalan, basta't sinusunod nila ang mga protocol at limitasyon.
Sa ilalim ng Memorandum Circular No. 82, na nilagdaan ni Executive Secretary Lucas Bersamin nitong Lunes, Abril 15, iniimplementa pa rin sa Pangulo, Pangalawang Pangulo, Secretary of Foreign Affairs, at Secretary of National Defense ang restrictions sa paglalakbay sa Taiwan at pakikipag-ugnayan sa mga kinatawan ng naturang bansa.
Nakasaad naman sa memorandum ang pagbabago mula sa mga nakaraang paghihigpit sa pamamagitan ng pagpayag na sa ilang mga opisyal ng gobyerno ng Pilipinas na bumisita sa Taiwan upang isulong ang kalakalan, pamumuhunan, at kooperasyong pang-ekonomiya, kabilang na ang mga larangan ng turismo, agham at teknolohiya, at edukasyon.
Gayunpaman, dapat ituring ang mga pagbisitang ito na “unofficial visits” dahil nag-aatas ang memorandum sa kanila na gumamit ng mga ordinary passport, nang walang mga opisyal na titulo, at nang may pag-unawa na ang naturang paglalakbay ay hindi bumubuo ng opisyal na pakikipag-ugnayan sa mga awtoridad ng Taiwan.
Kitty Duterte, ibinahagi latest na mensahe ni FPRRD sa kanilang pamilya
Dapat daw makipag-ugnayan ang mga opisyal na magsasagawa ng naturang paglalakbay sa Manila Economic and Cultural Office (MECO) at magsumite ng post-activity report sa MECO at sa Department of Foreign Affairs (DFA).
Nagtatakda rin ang sirkular ng mga kondisyon para sa pagtanggap ng mga delegasyon mula sa Taiwan,kung saan nakasaad ditong: “Philippine Government agencies may receive Taiwan delegations to promote trade, investment and economic cooperation, provided that they notify MECO of such visits at least five (5) days prior.”
Kinakailangang magsumite ng ulat sa MECO at sa DFA ang mga ahensyang tumatanggap ng naturang mga delegasyon sa loob ng 15 araw pagkatapos ng pagbisita.
Inulit ng memorandum ang pangangailangan para sa DFA clearance bago pumasok sa anumang written agreements sa Taiwan.
"No memorandum of understanding, exchange of letters or notes, or any similar instruments may be signed by any Philippine government agency with any Taiwan counterpart or entity, without the requisite clearance from the DFA," nakasaad din sa memorandum.
Argyll Cyrus Geducos
