Lumabas na nangunguna si Senador Bong Go sa pinakabagong Senatorial Preferences Survey ng Arkipelago Analytics, na isinagawa mula Marso 15 hanggang 21, 2025, matapos makakuha ng 64% na boto mula sa mga botanteng Pilipino. Si Go, na tumatakbo para sa kanyang ikalawang termino sa ilalim ng PDP–Laban, ay patuloy na tinatangkilik dahil sa kanyang malakas na presensya sa grassroots at mga inisyatiba sa serbisyo publiko.
Kasunod niya ang mga kilalang personalidad at magkapatid na sina Erwin Tulfo (59.8%, Lakas–CMD) at Ben “Bitag” Tulfo (57.7%, Independent). Si Erwin, dating kalihim ng DSWD, at si Ben, isang beteranong broadcaster, ay kapwa nakakuha ng mataas na suporta dahil sa kanilang patuloy na presensya sa media at adbokasiya.
Pumangalawa naman si dating Senate President Tito Sotto (NPC) na may 49.0%, habang si Senador Ronald “Bato” dela Rosa (PDP–Laban), kilalang kaalyado ng administrasyon at dating hepe ng PNP, ay nasa ikalimang puwesto na may 48.4%.
Nananatili rin sa itaas ng listahan sina Senadora Pia Cayetano (48.0%, Nacionalista Party) at Senador Ramon “Bong” Revilla Jr. (46.0%, Lakas–CMD). Nakapasok sa ikawalong puwesto si Willie Revillame (39.5%, Independent), isang TV host at negosyante na bagong mukha sa politika ngunit may malaking base ng tagasuporta.
Rita Avila, nagpaalala: 'Huwag na po tayong masilaw sa ayuda'
Kinumpleto naman ng Senador Lito Lapid (38.7%, NPC) at Makati Mayor Abby Binay (38.4%, NPC) ang Top 10. Sa ika-11 at ika-12 puwesto ay sina Rep. Camille Villar ng Las Piñas (37.9%, Nacionalista Party) at dating Senador Manny “Pacman” Pacquiao (37.7%, PFP), na kapwa kilala sa kani-kanilang mga larangan.
Bahagyang naiwan sa ika-13 puwesto si Senador Ping Lacson (37.5%, Independent), habang si Phillip “Ipe” Salvador(31.5%, PDP–Laban) at dating kongresista Rodante Marcoleta (30.0%, Independent) ay kapwa nakakuha ng malaking suporta. Si Senadora Imee Marcos (29.9%, Nacionalista Party) ay nasa ika-16 na puwesto, kasunod nina Jimmy Bondoc (29.5%, PDP–Laban) at Gringo Honasan (27.9%, Reform Party).
Nananatiling matatag ang suporta para sa mga kilalang oposisyon gaya nina Bam Aquino (27.7%, KNP) at Kiko Pangilinan (25.1%, Liberal Party), na nasa ika-19 at ika-20 puwesto. Samantala, sina Benhur Abalos (23.9%, PFP), Francis Tolentino (23.2%, PFP), at Raul Lambino (21.0%, PDP–Laban) ay patuloy na tinatangkilik ng kanilang mga tagasuporta.
Kasama sa susunod na hanay ng mga kandidato sina Atty. Vic Rodriguez (17.2%, Independent), Col. Bosita (17.1%, Independent), Nur-Ana Sahidulla (13.9%, Independent), at Doc Marites Mata (13.0%, Independent), na nakakuha ng boto mula sa kani-kanilang sektor.
Ang pambansang survey ay isinagawa sa 670 rehistradong botante gamit ang isang istrukturadong talatanungan at proportional stratified random sampling, upang matiyak ang representasyon ng populasyon base sa kasarian at lokasyon. Mayroon itong ±3.79% margin of error at 95% confidence level.
Habang papalapit ang halalan, nagpapakita ang survey ng kasalukuyang pulso ng bayan, kung saan nangingibabaw pa rin ang mga tradisyunal na pangalan sa politika, media personalities, at mga beteranong mambabatas sa senatorial race ngayong 2025.
