Loud and proud na inamin ni Kapamilya singer at Kwela Soul Diva Klarisse De Guzman ang sexual identity niya sa loob ng Bahay Ni Kuya.
Sa isang episode ng "Pinoy Big Brother Celebrity Collab Edition" kamakailan, sinabi ni Klarisse na isa raw siyang bisexual at mag-aapat na taon na siyang may karelasyon.
"May four-year akong partner. Her name is Trina. Hindi alam ng public, pero alam ng parents ko. And kasama ngayon ng mama ko is her," saad ni Klarisse.
Dagdag pa niya, "I guess komportable na akong sabihin sa inyong lahat. With Michelle Dee pa. Hindi ko mahintay na ma-meet n’yo siya."
BALITAnaw: Ang tuluyang pagkalas ng Pilipinas sa ICC noong Marso 17, 2019
Ngunit sa mahabang kasaysayan ng PBB bilang isang patok na reality show sa bansa, hindi si Klarisse ang kauna-unahang nagsiwalat ng totoo niyang sekswalidad.
MAKI-BALITA: Pag-amin ni Klarisse De Guzman: 'I'm not straight, I am bi!'
Rustom Padilla
Matagal nang “naaamoy” ang totoong pagkatao ni Rustom Padilla (ngayo’y BB Gandanghari) sa loob o labas man ng showbiz.
Ngunit naging ganap lang ang pagpapakatotoo ni Rustom sa isang edisyon ng PBB noong 2006. Inamin niya sa kaniyang kapuwa housemate na si Keanna Reeves na isa raw siyang gay.
“Nasa puso ‘yong pagiging gay. And I had no choice kasi na-realize ko na I’m gay,” saad ni Rustom.
Sa isang panayam noong Marso 25, inakala raw ni Keanna na magtatapat si Rustom ng pag-ibig sa kaniya nang mangyari ang pag-amin nito sa loob ng Bahay ni Kuya.
Aniya, "Jusko noong na-ano siya, siyempre natauhan ako. Tapos, siyempre, hindi ko na siya puwedeng... Sinabi ko sa kanya na paglabas na sana i-delay mo muna, tayo muna, tapos saka ka na magtapat."
Kalaunan, kinilala ni Rustom ang sarili bilang isang transgender.
MAKI-BALITA: 'I'm not gay!' BB Gandanghari, sinita noon si Robin Padilla dahil sa trato nito sa kaniya
Fifth Solomon
Sa isang edisyon ng PBB noong 2014, inamin ni Fifth Solomon kay Kuya na isa raw siyang bisexual habang magkausap silang dalawa sa loob ng conference room.
Ayon kay Fifth, bago siya nagpakatotoo, pamilya lang daw at ilang mga kaibigan
ang nakakaalam ng tunay niyang sekswalidad.
"Siguro, pinapansin na rin ng iba. So, tatanggapin ko na lang po para hindi na 'yon magagamit ng ibang tao laban sa akin," aniya.
Samantala, sa isang Instagram post noong Agosto 2024, sinariwa ni Fifth ang pagpapakatotoo niya at pinasalamatan niya ang PBB na nagsilbing daan para mailahad niya ang totoo niyang pagkatao.
Jerome Alacre
Sinalubong ni Jerome Alacre ang 2017 nang buong tapang at may paninindigan matapos ang task na ipinagawa sa kanila ni Kuya sa season 7 ng PBB. Pinalista sa kanila ang mga bagay na gusto na nilang baguhin o iwan sa 2016.
At bago nga tuluyang matapos ang taon, isang rebelasyon ang ibinahagi ni Jerome Alacre sa mga kapuwa niya housemates.
Ayon kay Jerome, "Marami akong mga worries. Ano 'yong mga pwedeng sabihin sa akin ng mga tao sa labas at kung paano ako magiging totoo. But this time, hindi ko na 'to iisipin.”
“Cora, Will, Aura, Baninay, and Tanner, I'm gay. I’m a gay man,” sabi pa niya.
Brx Ruiz
Nang mapabilang si Brx Ruiz sa hanay ng mga housemates na nanganganib mapalabas sa Bahay ni Kuya sa PBB Gen 11 noong 2024, sinimulan niyang buksan ang natatagong sarili sa publiko.
Bagama’t emosyunal, matapang pa ring sinabi ni Brx kay Kuya na isa raw siyang gay man.
“Alam ko na magiging life changing ‘to para sa akin. At isa ‘to sa mga reason ko, Kuya, kung bakit sumali ako, ‘yong kilalanin ko pa ‘yong sarili ko; maging matapang; at hindi iisipin kung ano ang iniisip ng ibang tao,” sabi ni Brx.
Dagdag pa niya, “Sumali ako dito dahil sa isang rason. Kuya, I’m a gay man.”
Samantala, nilinaw naman ni Brx na hindi ang pagiging nominado niya ang dahilan kung bakit siya umamin sa totoo niyang sekswalidad.
