Tuwing sasapit ang Chinese New Year, buhay na buhay ang mga lansangan ng Binondo at iba pang komunidad ng Tsinoy sa Pilipinas.
Ang masiglang pagsalubong sa bagong taon ay hindi lamang isang kasayahan kundi isang pagsasabuhay ng mayamang kultura at paniniwala ng mga Tsino na dinala ng kanilang mga ninuno sa bansa.
Ang pagdiriwang ng Chinese New Year ay may higit 3,000 taong kasaysayan, na nagsimula noong panahon ng Dinastiyang Shang sa China. Batay ito sa lunar calendar, kaya nagbabago ang petsa bawat taon, karaniwang nasa pagitan ng Enero 21 at Pebrero 20.
Isa sa mga pinagmulan ng selebrasyong ito ay ang alamat ng Nian, isang halimaw na natatakot sa ingay, liwanag, at kulay pula—kaya naging kaugalian ang pagpapaputok, pagsusuot ng pula, at pagsasabit ng pulang dekorasyon. Mayroon ding malalim na kaugnayan ang Chinese New Year sa Confucianism, Buddhism, at Taoism, kaya bahagi ng selebrasyon ang pagsamba sa mga ninuno sa pamamagitan ng pag-aalay ng pagkain at pagsisindi ng insenso.
ALAMIN: Bakit may ‘Chinatown’ sa Pilipinas?
Sa Pilipinas, matagal nang bahagi ng kultura ang pagdiriwang ng Chinese New Year dahil sa ugnayan ng mga Pilipino at Tsino bago pa dumating ang mga Espanyol.
Sa mga lugar tulad ng Binondo, Manila, patuloy na isinasagawa ng mga Tsinoy ang kanilang tradisyon tulad ng paghahanda ng masaganang pagkain, pagbibigay ng ang pao (pulang sobre na may pera), at pagsasagawa ng feng shui practices para sa suwerte.
Narito ang ilan sa pinakamahalagang tradisyon na isinasagawa ng mga Tsinoy tuwing Chinese New Year:
1. Paghahanda ng Masaganang Hapag-Kainan
Isa sa pinakamahalagang bahagi ng pagdiriwang ay ang pagsasalu-salo ng pamilya sa isang masaganang hapag-kainan. Ang bawat pagkaing inihahanda ay may natatanging simbolismo na may kaugnayan sa suwerte, kasaganaan, at mahabang buhay. Ilan sa mga tradisyunal na pagkain ay ang sumusunod:
Tikoy (年糕, Nián gāo) – Isang malagkit at matamis na kakanin na sumisimbolo sa matibay na ugnayan ng pamilya at patuloy na pag-angat sa buhay. Sa Mandarin, ang tunog ng "Nián gāo" ay katulad ng "taon-taon ay mas mataas," kaya’t ito ay itinuturing na pampasuwerte.
Pancit at Misua – Ang mga pagkaing ito ay sumasagisag sa mahabang buhay at kasaganahan. Pinaniniwalaang hindi dapat putulin ang mga hibla ng noodles upang hindi maputol ang suwerte.
Whole Fish (魚, Yú) – Ang isda, lalo na kung buo, ay sumisimbolo sa kasaganaan. Sa Mandarin, ang salitang "yú" ay may tunog na katulad ng "sobra" o "kalabisan," kaya’t ito ay nangangahulugan ng patuloy na daloy ng yaman at biyaya.
Dumplings (餃子, Jiǎo zi) – Hugis-ingot ang dumplings, kaya’t sinasabi na ang pagkain nito ay naghahatid ng kayamanan at tagumpay.
Prutas na Bilog (Tulad ng Ponkan, Dalanghita, at Mansanas) – Ang mga bilog na prutas ay sumisimbolo sa pera at suwerte. Ang ponkan (橙, Chéng) ay may katunog na "suwerte" sa Mandarin, kaya’t madalas itong ipinamamahagi sa mga kaibigan at kamag-anak.
2. Pamimigay ng "Ang Pao" (紅包, Hóng bāo)
Ang "ang pao" o pulang sobre na may lamang pera ay isa sa pinakaaabangang tradisyon tuwing Chinese New Year. Ipinamimigay ito ng mga nakatatanda sa mga bata at sa mga hindi pa kasal bilang pagbibigay ng biyaya para sa magandang hinaharap. Ang halaga ng pera sa loob ng sobre ay dapat nasa even number, dahil ang odd numbers ay nauugnay sa mga libing at kamalasan. Karaniwang iniiwasan ang numerong 4 dahil ang tunog nito sa Mandarin ("sì") ay katunog ng salitang "kamatayan."
Ang kulay pula ng sobre ay sumisimbolo sa suwerte, kasaganaan, at proteksyon laban sa masasamang espiritu. Sa modernong panahon, may mga digital na bersyon na rin ng hóng bāo na ipinadadala sa pamamagitan ng mobile apps sa China, ngunit sa Pilipinas, nananatili pa rin ang tradisyonal na pagbibigay ng pisikal na pulang sobre.
3. Pagsasagawa ng "Dragon Dance" at "Lion Dance"
Isang mahalagang bahagi ng pagdiriwang ang dragon dance at lion dance, kung saan makikita ang mahahabang dragon at makukulay na leon na sumasayaw sa saliw ng malalakas na tunog ng tambol at gong.
Dragon Dance (舞龙, Wǔ lóng) – Ang mahabang dragon na isinasayaw sa lansangan ay sumisimbolo sa kapangyarihan, kasaganaan, at tagumpay. Karaniwang mahaba ito, na may 9 hanggang 15 katao na nagpapagalaw sa katawan nito. Ito ay isang klase ng tradisyunal na sayaw sa bansang Tsina.
Lion Dance (舞狮, Wǔ shī) – Ang lion dance naman ay madalas na isinasagawa sa mga negosyo at tahanan upang paalisin ang malas at magdala ng suwerte. May dalawang uri nito: ang Northern Lion Dance, na may mas makulay at detalyadong disenyo, at ang Southern Lion Dance, na may mas dramatikong galaw at ginagamit sa Binondo.
Sa Binondo, isa sa pinakamalalaking Chinatown sa mundo, dinadagsa ng mga turista at lokal ang mga lansangan upang saksihan ang makulay na parada ng dragon at lion dance. Madalas ding inilalagay ang ang pao sa bibig ng mga leon bilang paraan ng pagbibigay ng donasyon at pagpapahayag ng pagpapasalamat.
4. Pagsisindi ng Paputok at Fireworks
Naniniwala ang mga Tsino na ang malalakas na ingay ng paputok at fireworks ay may kakayahang itaboy ang masasamang espiritu at malas. Ang ugat ng paniniwalang ito ay nagmula sa alamat ng Nian (年獸, Nián shòu)—isang halimaw na sumasalakay sa mga baryo tuwing bagong taon. Ayon sa kwento, natuklasan ng mga tao na natatakot si Nian sa malalakas na ingay at maliwanag na ilaw, kaya’t nagsimula silang gumamit ng paputok upang mapalayas ito.
Sa Pilipinas, bagaman mahigpit na ipinagbabawal ang ilang uri ng paputok, marami pa ring pailaw at fireworks display ang ginaganap sa Binondo at iba pang lugar na may malaking populasyon ng Tsinoy.
5. Pagsusuot ng Pulang Damit at Dekorasyon
Sa paniniwala ng mga Tsinoy, ang kulay pula ay nagdadala ng suwerte at proteksyon laban sa malas. Kaya naman, tuwing Chinese New Year, marami ang nagsusuot ng pulang damit at nagsasabit ng mga dekorasyong pula sa kanilang tahanan. Ilan sa mga tradisyunal na dekorasyon ay ang:
Chinese Lanterns (紅燈籠, Hóng dēng lóng) – karaniwang pula oval-shaped at may dekorasyon na gold tassels ang mga lantern na isinabit sa mga pintuan upang magdala ng liwanag, warmth at suwerte sa pamilya. Sa ancient China, ito ay ginagamit para magsilbing ilaw, bilang parte o bahagi ng pagsamba.
Couplets (春聯, Chūnlián) – Ito ay mga pulang papel na may nakasulat na golden Chinese characters na nagpapahayag ng good fortune, happiness, at prosperity.
Fu Character (福, Fú) – Madalas itong isinulat nang pabaligtad ("倒福, Dào fú") dahil ang tunog ng "dào" ay kahawig ng "pagdating," kaya’t nangangahulugan itong "dumating na ang suwerte.
6. Pagsasagawa ng Ritwal ng Pag-aalay at Pagsisindi ng Insenso
Ang pag-aalay at pagsisindi ng insenso ay mahalagang bahagi ng tradisyon ng mga Tsinoy tuwing Chinese New Year. Ito ay isinagawa bilang tanda ng respeto sa kanilang mga ninuno at paghingi ng gabay at biyaya sa darating na taon.
Pag-aalay ng Pagkain – Karaniwang nag-aalay ang mga pamilya ng pagkain sa kanilang altar, tulad ng prutas (madalas ay bilog na prutas tulad ng ponkan at mansanas), kanin, at mga lutong pagkain. Ang mga pagkaing ito ay inihahandog sa mga ninuno bilang pasasalamat at upang hingin ang kanilang patnubay at proteksyon.
Pagsisindi ng Insenso – Ang insenso ay sinisindihan upang linisin ang paligid at itaboy ang masasamang espiritu. Pinaniniwalaan din na ang usok ng insenso ay daan upang maabot ang mga panalangin ng pamilya sa langit. Sa ilang pamilya, ginagamit din ang insenso bilang bahagi ng seremonya ng feng shui, upang tiyakin ang tamang daloy ng enerhiya sa kanilang tahanan o negosyo.
Pagtungo sa Templo – Bukod sa mga altar sa tahanan, maraming Tsinoy ang pumupunta sa mga Buddhist o Taoist temple upang magdasal at magsindi ng insenso. Pinaniniwalaan nilang ang dasal sa simula ng bagong taon ay magdadala ng suwerte at maayos na kapalaran para sa kanilang pamilya.
Pagpapatuloy ng Tradisyon
Sa kabila ng modernisasyon at pagbabago ng panahon, nananatiling buhay ang mga tradisyong ito sa mga komunidad ng Tsinoy sa Pilipinas. Hindi lamang ito simpleng pagdiriwang kundi isang paraan ng pagpapahalaga at pagpapanatili ng mayamang kultura at paniniwala ng kanilang mga ninuno.
Sa bawat putok ng paputok, bawat tunog ng tambol, at bawat pagsasama-sama ng pamilya sa hapag-kainan, hindi lamang ipinagdiriwang ng mga Tsinoy ang pagpasok ng panibagong taon kundi ipinapasa rin nila sa susunod na henerasyon ang kanilang mga kaugalian—mga kaugaliang nagpapatibay sa kanilang pagkakakilanlan bilang bahagi ng mas malawak na lipunang Pilipino.
Mariah Ang
