Tuwing buwan ng Oktubre, nararamdaman na ng maraming Pilipino ang papalapit na Halloween—isang panahon na puno ng mga kuwento ng kababalaghan, nakakatakot na dekorasyon, at tradisyong nag-uugat mula pa noong sinaunang panahon.
Pinagmulan ng Halloween
Ang Halloween ay nagmula sa sinaunang selebrasyon ng mga Celtic sa Europa na tinatawag na Samhain—isang paganong pagdiriwang tuwing Oktubre 31 na nagmamarka ng pagtatapos ng ani at pagsisimula ng taglamig. Naniniwala ang mga Celtic na sa gabi ng Samhain, ang mga espiritu ng mga yumao ay bumabalik sa mundo ng mga buhay. Upang ipagbunyi ang araw na ito at iwasan ang masasamang espiritu, nagbibihis sila ng mga maskara at nagsisindi ng bonfire.
Nang maging Kristiyano ang karamihan ng Europa, ipinakilala ng Simbahang Katoliko ang All Saints’ Day o Araw ng mga Santo tuwing Nobyembre 1 bilang kapalit ng paganong selebrasyon. Ang bisperas nito, Oktubre 31, ay tinawag na All Hallows’ Eve, na kalauna'y naging Halloween. Kasabay ng pagbabago ng relihiyon, napanatili ang mga tradisyon ng pagbibihis at pangangaluluwa, na ngayon ay bahagi na ng kasalukuyang Halloween.
BALITAnaw: Paano nga ba nagsimula ang 'World Smile Day?'
Pag-usbong ng Halloween sa Pilipinas
Sa Pilipinas, bago pa man makilala ang Halloween sa kontemporaryong anyo nito, mayroon nang mga lokal na tradisyon na nag-aalala sa mga kaluluwa ng mga yumao, tulad ng Undas o Araw ng mga Patay. Ipinagdiriwang ito tuwing Nobyembre 1 at 2, at bahagi nito ang pagsisindi ng kandila sa mga puntod, pag-aalay ng dasal, at paminsang mga handog para sa mga kaluluwa.
Noong nagsimulang maimpluwensyahan ang Pilipinas ng mga kulturang Kanluranin, kasama na rito ang popularidad ng Halloween. Sa ngayon, ang buwan ng Oktubre ay hindi lamang nakikita bilang preparasyon para sa Undas, kundi pati na rin bilang pagdiriwang ng mas modernong konsepto ng Halloween. Makikita ito sa mga Halloween party, costume contests, at mga dekorasyon sa mga tahanan at komersyal na lugar. Gayunpaman, hindi nawawala ang orihinal na diwa ng pag-aalala sa mga yumao, dahil ang Undas ay nananatiling mas mahalagang tradisyon para sa mga Pilipino.
Halloween at Komersyalismo
Ang paglakas ng media at komersyo ay nagpalawak din ng popularidad ng Halloween sa Pilipinas. Mga mall, establisyimento, at negosyo ang nagsimulang maglunsad ng mga Halloween sale, events, at aktibidad upang mas mapakinabangan ang selebrasyon. Ang trick or treat, isang pangkaraniwang gawain sa mga bata sa Estados Unidos, ay unti-unti na ring tinatangkilik sa ilang komunidad dito sa bansa.
Ang Selebrasyon Ngayon
Sa kasalukuyan, ang Halloween ay hindi na lang isang paggunita sa mga patay at kababalaghan. Isa na rin itong panahon ng kasiyahan, pagsasama-sama ng pamilya at mga kaibigan, at isang pagkakataon upang maging malikhain sa pagbibihis at dekorasyon. Bagamat iba-iba ang paraan ng pagdiriwang, nananatili ang layunin ng tradisyon—ang paggunita sa mga yumao, pag-iwas sa masasamang espiritu, at ang pagtanggap sa ideya ng pagkakaisa ng mga buhay at patay sa isang gabi.
Bagama't maraming nagbago sa paraan ng pagdiriwang, hindi nagbabago ang esensya ng paggunita sa ating mga ninuno at pagyakap sa mga kuwento ng kababalaghan.
Mariah Ang
