Ikinatuwa ni dating senador at ngayo’y Chief Presidential Legal Counsel Juan Ponce Enrile ang naging pag-abswelto sa kaniya, at maging sa kaniyang dating chief of staff na si Gigi Reyes at negosyanteng si Janet Lim-Napoles, sa kasong plunder kaugnay ng pork barrel fund scam.
Nitong Biyernes, Oktubre 4, nang ipawalang-sala ng Sandiganbayan Special Third Division sina Enrile, Reyes at Napoles sa ₱172-million plunder case dahil sa “failure of the prosecution to prove their guilt beyond reasonable doubt.”
Hindi umano napatunayang nakipagsabwatan si Enrile kina Reyes at Napoles upang magkamal ng ₱172.83 milyong kickback mula sa kaniyang Priority Development Assistance Fund (PDAF).
Kaugnay nito, sa panayam ng mga mamamahayag nito ring Biyernes ay sinabi ni Enrile na alam na raw niyang ipapawalang-sala siya dahil wala naman umano silang ginawang kahit ano hinggil sa naturang kaso.
Sen. Bong Go, pinakiusapan si Sen. Imee na pagkasunduin muli sina PBBM, VP Sara
"I knew all along that I will be acquitted because we have not done anything in this case,” ani Enrile.
“And I hope the people who filed those cases against us will examine their conscience,” saad pa niya.
Matatandaang taong 2014 nang isinampa ang kasong plunder na nag-ugat sa mga alegasyong nagkamal umano ang grupo ni Enrile ng ₱172 milyon mula sa PDAF sa pagitan ng 2004 at 2010.
