Naglabas ng pahayag ang Department of Education (DepEd) nitong Biyernes, Marso 1, kaugnay ng mga natatanggap umano nilang reklamo na may mga school personnel na nagbebenta o nag-uutos sa mga estudyanteng bumili ng booklets o workbooks para sa Catch-Up Fridays at iba pang mga aktibidad.

“The Department reiterates that such acts are strictly prohibited,” pagbibigay-diin ng DepEd sa isang pahayag na inilabas sa kanilang Facebook page.

“Catch-Up Fridays and other school activities must not involve out-of-pocket costs. Parents and learners are reminded not to accommodate and patronize such unauthorized transactions,” dagdag nito.

Nagsasagawa na raw ng imbestigasyon ang departamento kaugnay ng naturang usapin.

‘Catch-up day’ tuwing Biyernes, ipatutupad ng DepEd sa 2024 – VP Sara

“Any individual found guilty of such scheme shall face appropriate administrative sanctions,” pag-abiso ng DepEd.

Hinikayat din nito ang publiko na i-report ang mga kaparehong insidente sa kanilang Office of the Secretary sa [email protected].

Matatandaang noong Nobyembre 2023 nang ianunsyo ni Vice President at DepEd Secretary Sara Duterte na gagawin nilang “catch-up day” ang bawat araw ng Biyernes upang tulungan umano ang mga estudyanteng mahasa ang kanilang reading at literacy skills.

Nagsimula naman ang implementasyon ng Catch-Up Fridays noong Enero 12, 2024.