Patuloy na nakaaapekto ang northeast monsoon o amihan at easterlies sa malaking bahagi ng bansa, ayon sa Philippine Atmospheric, Geophysical and Astronomical Services Administration (PAGASA) nitong Sabado, Pebrero 24.
Sa tala ng PAGASA kaninang 4:00 ng madaling araw, inaasahang makararanas ng maulap na kalangitan na may kasamang kalat-kalat na pag-ulan at thunderstorms sa Bicol Region, Northern Samar, Eastern Samar, at Samar bunsod ng easterlies o ang mainit na hanging nagmumula sa karagatang Pasipiko.
Pinag-iingat naman ang mga residente sa mga nasabing lugar sa posible raw pagbaha o kaya nama’y pagguho ng lupa tuwing magkakaroon ng malalakas na pag-ulan.
Samantala, posible umanong makaranas ng maulap na kalangitan na may katamtamang pag-ulan sa Batanes at Babuyan Islands dahil sa malamig na hanging amihan.
Amihan season, inaasahang matatapos sa Marso – PAGASA
Bukod dito, malaki rin ang tsansang magdadala ang amihan ng medyo maulap hanggang sa maulap na kalangitan na may pulo-pulong mahihinang pag-ulan sa Ilocos Region, Cordillera Administrative Region, at mga natitirang bahagi ng Cagayan Valley.
Wala namang inaasahang matinding epekto ang mga magiging pag-ulan dito.
Inihayag din ng PAGASA na posibleng makaranas ng medyo maulap hanggang sa maulap na kalangitan na may kasamang isolated rainshowers o thunderstorms sa Metro Manila at mga natitirang bahagi ng bansa dahil sa easterlies o sa localized thunderstorms.
Posible rin daw ang pagbaha o kaya nama’y pagguho ng lupa sa mga nasabing lugar tuwing magkakaroon ng malalakas na thunderstorms.
Sa kasalakuyan ay wala namang binabantayan ang PAGASA na alinmang bagyo o low pressure area (LPA) sa loob o labas ng Philippine area of responsibility (PAR).
Kaugnay na Balita:
