Inihayag ng OCTA Research nitong Lunes, Enero 22, na lumabas sa kanilang survey na hindi urgent national concern para sa maraming mga Pilipino ang Charter Change (Cha-cha).
Base sa 2023 Fourth Quarter "Tugon ng Masa" survey ng OCTA, 1% lamang umano sa mga Pilipino ang naniniwalang dapat agarang maaksiyunan ng pamahalaan ang Cha-cha, na isinusulong ngayon sa bansa sa pamamagitan ng nagpapatuloy na People’s Initiative (PI).
Samantala, ayon pa sa OCTA, ang pagkontrol ng inflation ang nananatiling top urgent concern para sa 73% ng mga Pinoy.
Pumangalawa naman daw sa “top urgent national concern” para sa mga Pilipino ang pagkakaroon ng access sa abot-kayang presyo ng mga pagkain (45%).
Sinundan naman ito ng paglikha ng mga trabaho (36%), pagpapataas ng sahod ng mga manggagawa (34%), at pagpapababa ng bilang ng mahihirap (32%).
VP Sara supporters, dumagsa sa Davao City para sa 'Inday Sara Duterte 2028 Movement' rally
Bukod sa mga nabanggit, itinuturing din daw ng “urgent national concern” ng mga Pinoy ang mga sumusunod:
- Pagkakaroon ng dekalida na edukasyon (15%)
- Paglaban sa korapsyon (13%)
- Pagsusulong sa peace and order (10%)
- Pagsugpo sa kriminalidad (8%)
- Pagpapatupad ng batas (7%)
- Pagbawas sa halaga ng binabayarang tax (6%)
- Pagprotekta sa mga manggagawang Pilipino sa ibang bansa (4%)
- Paghahanda sa anumang uri ng banta ng terorismo (4%)
- Pagtigil sa pang-aabuso sa kapaligiran (4%)
- Pagdepensa sa teritoryo ng Pilipinas (3%)
- Pagpigil sa pagkalat ng Covid-19 (3%)
- Pagkontrol sa pagdami ng populasyon (3%)
Isinagawa umano ang naturang survey mula Disyembre 10 hanggang 14, 2023 sa pamamagitan ng pakikipanayam sa 1,200 respondents na may edad 18 pataas.
