Nangako ang Philippine Charity Sweepstakes Office (PCSO) nitong Huwebes na tututukan pa nito sa susunod na taon ang pagtulong sa mas maraming batang nasa pangangalaga ng mga bahay-asilo sa bansa.
“There are many institutions catering to our vulnerable sectors, particularly children, who need support. Makakaasa po ang mga kababayan natin na sa susunod na taon ay tututukan natin ang mga ito,” pahayag ni PCSO chairperson Junie Cua.
Inilabas ni Cua ang pahayag kasunod ng pagbisita ng mga tauhan ng PCSO sa SOS Children's Village sa Lipa, Batangas kamakailan.
Isa ang nasabing international at non-governmental organization sa mga sumusuporta sa mga batang iniwan ng mga magulang sa bansa.
Tiniyak din ng opisyal sa naturang organisasyon na susuporta sa mga proyektong nakatuon sa kapakanan ng mga pinabayaang bata.
PNA
