"Hopefully this marks the start of SMNI and the people behind it being made accountable.”
Ito ang pahayag ni ACT Teachers Party-list Rep. France Castro sa naging pagsuspinde ng Movie and Television Review and Classification Board (MTRCB) sa dalawang programa ng Sonshine Media Network International (SMNI), isang media company na pagmamay-ari ni Pastor Apollo Quiboloy.
Matatandaang nitong Martes, Disyembre 19, nang ihayag ng MTRCB na naglabas ito ng 14-day preventive suspension laban sa SMNI programs na “Laban Kasama ang Bayan” at “Gikan Sa Masa, Para Sa Masa,” kung saan epektibo umano ito nitong Lunes, Disyembre 18.
MTRCB, sinuspinde 2 shows ng SMNI
"This suspension is long overdue but at last now something has been done to curtail the constant red-tagging, spreading of disinformation (fake news) and threatening of individuals using these two shows as well as the network," ani Castro sa isang pahayag nito ring Martes.
"Hopefully this marks the start of SMNI and the people behind it being made accountable. The authorities should look into the pattern and consistent red-tagging, terrorist-labelling for longer and more decisive measures," saad pa niya.
Matatandaang inihayag ng MTRCB na sinuspinde nito ang “Gikan Sa Masa, Para Sa Masa” dahil daw sa “death threats” at “profane language” ng guests ng show sa dalawang episodes nito.
Kamakailan lamang, pinatutsadahan ni dating Pangulong Rodrigo Duterte sa naturang show si Castro, at sinabing gagamitin umano ng kaniyang anak na si Vice President Sara Duterte ang confidential at intelligence funds (CIF) nito para sa Reserve Officers’ Training Corps (ROTC) at upang ihinto umano ang communist insurgency sa bansa.
“Pero ang una mong target sa intelligence fund mo, ‘kayo, ikaw, France (Castro), kayong mga komunista ang gusto kong patayin,” ani Duterte kamakailan.
https://balita.net.ph/2023/10/12/ex-pres-rodrigo-duterte-nagpatutsada-kay-rep-castro/
Samantala, sinuspinde umano ng MTRCB ang “Laban Kasama ang Bayan” dahil sa “unverified report” nito hinggil sa umano’y ₱1.8 billion travel funds ni House Speaker Martin Romualdez.
