Nabalot na naman ang tensyon ang rotation and resupply (RoRe) mission ng gobyerno sa BRP (Barko ng Republika ng Pilipinas) Sierra Madre sa Ayungin Shoal matapos bombahin ng tubig at salpukin ng mga barko ng China Coast Guard (CCG) ang mga sasakyang pandagat ng Pilipinas nitong Linggo.
Sa pahayag ng National Task Force-West Philippine Sea (NTF-WPS) nitong Disyembre 10, binomba ng tubig, hinarangan at nagsagawa ng mapanganib na pagmaniobra ang barko ng CCG, kasama ang Chinese Maritime Militia vessel laban sa BRP Cabra, M/L Kalayaan at Unaizah Mae 1 (UM1) chartered supply vessels.
Paliwanag ng Task Force, sinalpok din ng CCG 21556 ang UM1. Gayunman, nakarating pa rin ito sa BRP Sierra Madre kung saan isinagawa ang RoRe mission.
Nasira naman ang makina ng M/L Kalayaan resupply boat matapos bombahin ng tubig ng isa pang barko ng CCG kaya't hinatak na lamang ito ng BRP Sindangan pabalik sa Ulugan Bay, Palawan.
Bukod dito, nasira rin ang mast ng BRP Cabra o posteng nakatayo sa gitna ng barko matapos bugahan ng water cannon ng CCG.
"We condemn, once again, China's latest unprovoked acts of coercion and dangerous maneuvers against a legitimate and routine Philippine rotation and resupply mission to Avungin Shoal that has put the lives of our people at risk. The systematic and consistent manner in which the People's Republic of China carries out these illegal and irresponsible actions puts into question and significant doubt the sincerity of its calls for peaceful dialogue. Peace and stability cannot be achieved without due regard for the legitimate, well-established, and legally settled rights of others. We demand that China demonstrate that it is a responsible and trustworthy member of the international community," pagdidiin pa ng NTF-WPS.
Iginiit din ng NTF-WPS na saklaw pa rin ng exclusive economic zone ng Pilipinas ang Ayungin Shoal alinsunod na rin sa UNCLOS (United Nations Convention on the Law of the Sea) at pinagtibay ng Arbitral Award noong 2016.
