Inaasahang magdudulot ng mga kalat-kalat na pag-ulan ang shear line sa malaking bahagi ng Northern Luzon ngayong Biyernes, Nobyembre 3, ayon sa Philippine Atmospheric, Geophysical and Astronomical Services Administration (PAGASA).
Sa tala ng PAGASA kaninang 4:00 ng madaling araw, malaki ang tsansang magdala ang shear line ng maulap na kalangitan na may kalat-kalat na pag-ulan at thunderstorms sa Ilocos Norte, Apayao, Batanes, Cagayan, at Isabela.
Posible umano ang pagbaha o kaya nama'y pagguho ng lupa sa mga nasabing lugar tuwing magkakaroon ng katamtaman hanggang malalakas na pag-ulan.
Malaki naman umano ang tsansang makaranas ng medyo maulap hanggang sa maulap na may kasamang isolated rainshowers o thunderstorms ang Metro Manila at mga natitirang bahagi ng bansa bunsod ng localized thunderstorms.
Maaaring magkaroon ng pagbaha o kaya nama’y pagguho ng lupa sa mga nasabing lugar tuwing magkakaroon ng malalakas na thunderstorms, saad ng PAGASA.
44°C heat index, naitala sa 4 na lugar sa Luzon!
Samantala, ayon din kay PAGASA Weather Specialist Aldczar Aurelio, humina na ang northeast monsoon o amihan kaya’t hindi na umano ito nakaaapekto sa alinmang bahagi ng bansa.
Wala rin umanong binabantayan ang PAGASA na bagong bagyo o low pressure area (LPA) sa loob at labas ng Philippine area of responsibility (PAR).
