Sinuportahan ni Manila 6th District Representative Bienvenido Abante Jr. ang desisyon ng Movie and Television Review and Classification Board (MTRCB) na magpataw ng 12 airing days suspension sa “It’s Showtime” dahil nasa mandato umano nitong protektahan ang mga bata laban sa “kalaswaan.”

Matatandaang Setyembre 4, 2023 nang inilabas ng MTRCB ang pagpapataw nito ng suspensyon sa “It’s Showtime” kaugnay ng pagkain ng icing ng cake nina Vice Ganda at Ion Perez sa segment na “Isip Bata.”

“The MTRCB has a mandate to protect Filipino audiences against indecency in our airwaves and to protect our children against obscenity. They did the right thing,” pahayag ni Abante, na siya ring House Committee on Human Rights Chairperson.

It’s Showtime, sinuspinde ng 12 airing days ng MTRCB

Ayon pa kay Abante, maituturing daw na “justified” ang desisyon ng MTRCB dahil nagsisilbi rin umano itong mensahe para sa television show producers at mga artista na madalas nakakalimot at nakakapagpalabas ng mga hindi naaangkop para sa mga batang manonood.

“[Filipino audiences] are frequently bombarded by lewd, risqué, and racy material on television and online… so much so that I fear that we have become inured to vulgarity in the media,” ani Abante.

“It is so commonplace now that we have become accustomed to double entendre and veiled kabastusan intended to catch the attention of Filipino audiences. Paniniwala ko, sumusobra na. It is time for the government to step in and promote positive values, to protect our families,” saad pa niya.

Iginiit din ng mambabatas na dapat isama sa “Bagong Pilipinas” campaign ng kasalukuyang administrasyon ang pagsusulong ng “traditional Filipino family values” para sa mas maayos umanong lipunan.

“Faith and family values are the foundations of a great nation. We should vigilantly guard against the erosion of these values because if we teach our people to accept minute doses of immorality, they will eventually develop a tolerance to immorality on a grander scale,” ani Abante.

Matatandaang inilunsad ng Malacañang ang “Bagong Pilipinas” campaign noong Hulyo bilang bago umanong “brand” ng governance at leadership ng administrasyon ni Pangulong Ferdinand “Bongbong” Marcos Jr.