Pagkakalooban ng Light Rail Transit Line 2 (LRT-2) ng libreng sakay ang mga atleta at kalahok ng ika-63rd Palarong Pambansa ngayong taon.
Sa advisory ng Light Rail Transit Authority (LRTA), na siyang nangangasiwa sa operasyon ng LRT-2, nabatid na magsisimula ang libreng sakay sa buong panahon ng Palarong Pambansa o mula Lunes, Hulyo 31, hanggang sa Agosto 5, Sabado.
Bukod sa mga atleta, kasama rin sa maaaring mag-avail ng libreng sakay ay ang mga coaches at trainers, miyembro ng National & Local Committee, volunteers, technical workers, mga opisyal, medical staff at maging accredited media.
Vlogger na nag-prank at pinahabol matandang pump attendant, kinuyog online!
"Bilang suporta sa 2023 Palarong Pambansa, ihahandog ng Light Rail Transit Authority (LRTA) ang libreng sakay sa LRT-2 simula July 31 hanggang August 5 para sa mga atleta at delegado nito," abiso ng LRTA.
Kinakailangan lamang ng mga ito na ipakita sa teller ang kanilang Palarong Pambansa ID para i-avail ang libreng sakay.
Ang 63rd Palarong Pambansa ay binuksan nitong Lunes at kasalukuyan itong ginaganap sa Marikina City, na siyang host ng multi-sport event ngayong taong ito.
