Nakapagtala ang Department of Health (DOH) ng 2,747 bagong kaso ng Covid-19 sa bansa mula Hunyo 26 hanggang Hulyo 2.
Batay sa National Covid-19 Case Bulletin na inilabas ng DOH nitong Lunes, nabatid na ang average na bilang ng bagong kaso ng sakit kada araw ngayong linggo ay nasa 392.
Ito ay mas mababa ng 20% kung ikukumpara sa mga kasong naitala noong Hunyo 19 hanggang 25.
Anang DOH, sa mga bagong kaso, 32 ang may malubha at kritikal na karamdaman.
Mayroon din namang naitalang dalawang pasyente na pumanaw dahil sa karamdaman, ngunit wala sa mga ito ang naganap noong Hunyo 19 hanggang Hulyo 2.
Iniulat pa ng DOH na noong Hulyo 2, 2023, mayroong 442 na malubha at kritikal na pasyente na naka-admit sa mga ospital dahil sa Covid-19.
Sa 1,998 ICU beds para sa mga pasyenteng may Covid-19, 273 o 13.7% ang okupado habang nasa 3,010 o 17.7% naman ng 17,026 non-ICU Covid-19 beds ang kasalukuyan ding ginagamit.
Kaugnay nito, mahigpit pa ring pinapaalalalahan ng DOH ang lahat na huwag maging kampante sa banta ng Covid-19.
"Bagkus, dapat natin ipagpatuloy ang tamang pagsunod sa minimum public health standards sa ilalim ng Alert Level 1," anang DOH.
Paalala pa ng DOH, palagiang magsuot ng best-fitted face mask at kung maaari, manatili sa well-ventilated na mga lugar.
Payo nito, "Sa oras na makaramdam ng sintomas, AGAD NA MAG-ISOLATE. Para sa karagdagang proteksyon laban sa banta ng Covid-19, agad-agaran na tayong magpabakuna at booster."
Probinsya
