Ibinahagi ni Pasig City Mayor Vico Sotto na plano ng pamahalaang lungsod na magtayo ng pangalawang aklatan sa lungsod sa 2024.

Noong Martes, Abril 11, ibinahagi ni Sotto na may natukoy siyang lote ng lupa sa District 2 ng Barangay Sta. Lucia na posibleng makuha para sa bagong library.

Gayunpaman, nilalakad pa rin ng lokal na pamahalaan ang proseso ng pagkuha dahil ang naturang lote ay sinasabing pag-aari ng pambansang pamahalaan, aniya.

“Ayusin natin this year ‘yung lupa. Next year, baka pwede na natin pagtayuan hopefully,” ani Sotto.

VP Sara, tahasang iginiit na hindi niya binoto si Romuadlez

Pinili ang lote dahil wala pa ring library sa lugar ng District 2 sa Pasig, ani Sotto.

Makakadagdag ang bagong aklatan sa mga serbisyong inaalok na ng mga pangunahing learning hub ng lungsod – ang Pasig City Library and Learning Resource Center (PCLLRC), na matatagpuan sa Caruncho Avenue, Barangay San Nicolas, gayundin ang Pasig City Hall Library (PCHL) sa ikawalong palapag ng city hall.

Binigyang-diin ni Sotto ang layunin ng lokal na pamahalaan na dagdagan ang mga libreng puwang sa pag-aaral para sa mga Pasigueno sa lahat ng edad.

Ginagamit ng mga estudyante at nagtatrabahong indibidwal ang mga lugar na ito para magawa ang mga kinakailangan sa paaralan at mga gawaing may kaugnayan sa trabaho. Ang library ng city hall, sabi ni Sotto, ay mataas ang demand.

“Karamihan talaga nakikita natin, mga kabataan naghahanap ng puwesto kung saan pwede mag-aral. Kaya gusto po natin maging mas accessible. Gusto natin makatulong sa mga nag-aaral,” anang alkalde.

Mga nakalatag na proyekto pang-imprastraktura

Habang tinitingnan ng lokal na pamahalaan ang pagtatayo ng aklatan sa 2024, nakatutok din ito sa pagsisimula ng iba't ibang malalaking proyektong pang-imprastraktura para sa 2023.

Kabilang dito ang pagsasaayos ng PCLLRC at Science Discovery Centrum (SDC), na nasa ikalawang palapag ng pangunahing aklatan. Ang pagtatayo ng bagong SDC ay gagawin ayon sa pambansa at internasyonal na pamantayan.

Magsisimula na rin ngayong taon ang mga pagsasaayos para sa Special Children Education Institute (SCEI) sa Caruncho Avenue, Barangay San Nicolas.

Ang SCEI ay ang institusyong pang-edukasyon ng lungsod para sa mga batang may espesyal na pangangailangan. Sinabi ni Sotto na binisita na ito ng Engineering Office at inaprubahan na ang program of work para sa mga pagsasaayos.

Ang mga proyekto para sa SCEI ay naglalayong tulungan ang lokal na pamahalaan sa layunin nitong palakasin at pagbutihin ang mga serbisyo nito para sa mga persons with disabilities (PWDs) sa lungsod.

Binanggit ni Sotto ang nakaraang benchmarking visit ng mga staff ng Office of the City Mayor at ng Pasig SCEI sa Carmona, Cavite para malaman ang kanilang mga programa sa PWD. Sa partikular, inaasahan ng lokal na pamahalaan na gamitin ang pinakamahusay na kasanayan ng Carmona sa pagsusubaybay sa mga mag-aaral ng PWD sa antas ng barangay - mula sa kapanganakan hanggang sa edad para makapag-aral - upang mas mahusay na matugunan ang kanilang mga pangangailangan.

Ang mga proyektong ito ay kasama sa inaprubahang P15 bilyon na badyet ng lungsod para sa 2023.

Khriscielle Yalao