Pinaghatian ng dalawang mapalad na lotto bettors ang mahigit sa ₱33.6 milyong jackpot prize ng SuperLotto 6/49 na binola ng Philippine Charity Sweepstakes Office (PCSO) nitong Martes ng gabi.
Sa abiso ng PCSO, nabatid na matagumpay na nahulaan ng dalawang lucky winners ang six-digit winning combination ng SuperLotto 6/49 na 12-29-35-34-13-08, kaya naiuwi ng mga ito ang katumbas na jackpot prize na ₱33,643,692.60.
Ayon kay PCSO Vice Chairperson at General Manager Melquiades Robles, nabili ng mapalad na mananaya ang kanilang lucky tickets sa Pasay City sa Metro Manila at sa San Mateo, Rizal.
Upang makubra naman ang kanilang premyo, pinayuhan ni Robles ang mga ito na magtungo lamang sa punong tanggapan ng PCSO sa Mandaluyong City.
Tinapyasang budget ng opisina ni VP Sara, ‘di na dapat baguhin – Sen. Risa
Kailangan rin aniya ng mga ito na magprisinta ng dalawang balidong IDs at ang kanilang winning tickets.
Ipinaalala naman ni Robles na alinsunod sa TRAIN Law, ang lahat ng premyong lampas sa ₱10,000 ay kakaltasan ng 20% tax.
Ang mga premyo naman aniya na hindi makukubra sa loob ng isang taon matapos ang petsa nang pagkapanalo, ay awtomatikong ipo-forfeit at mapupunta sa kawanggawa.
Muli ring umapela si Robles sa publiko na patuloy na tangkilikin ang mga palaro ng PCSO, partikular na ang lotto, upang magkaroon na ng pagkakataong maging milyonaryo, ay makatulong pa sa kawanggawa.
Ang SuperLotto 6/49 ay binubola tuwing Martes, Huwebes at Linggo.
