Patuloy na makararanas ng pag-ulan at thunderstorms ang malaking bahagi ng bansa ngayong Martes, Pebrero 21, dahil sa low pressure area (LPA) at northeast monsoon o amihan, ayon sa Philippine Atmospheric, Geophysical and Astronomical Services Administration (PAGASA).
Sa tala ng PAGASA, namataan kaninang 3:00 ng madaling araw ang LPA sa layong 340 kilometro sa silangan hilagang-silangan ng Casiguran, Aurora o 345 kilometro sa silangan ng Tuguegarao City, Cagayan.
“This weather disturbance is less likely to develop into a tropical depression,” anang PAGASA.
Maghahatid ang LPA ng maulap na may kalat-kalat na pag-ulan at thunderstorms sa Mainland Cagayan, Isabela, Aurora, at Quezon.
UP, top university pa rin sa Pinas; Iba pang paaralan sa bansa, pasok sa Asian ranking!
Samantala, magkakaroon din ng maulap na may pag-ulan sa Batanes at Babuyan Islands dahil naman sa amihan.
Pinag-iingat ng PAGASA ang mga nasabing lugar sa maaaring maging pagbaha o kaya naman ay pagguho ng lupa dahil sa katamtaman hanggang sa malakas na pag-ulan.
Magkakaroon naman ng medyo maulap hanggang sa maulap na may panaka-nakang pag-ulan o thunderstorms sa Metro Manila at mga natitirang bahagi ng bansa bunsod ng LPA o ng localized thunderstorms.
Posible rin ang pagbaha o kaya naman ay pagguho ng lupa sa mga lugar naturang lugar tuwing magkakaroon ng malakas na thunderstorms.
Samantala, makarararanas ng medyo maulap hanggang sa maulap na may kasamang katamtamang pag-ulan sa Ilocos Region at Cordillera Administrative Region dahil sa amihan. Wala namang inaasahang malaking epekto ang pag-ulan dito.
