Inilabas ng Social Weather Station (SWS) nitong Martes, Pebrero 21, na tinatayang 69% ng mga Katolikong Pilipino na nasa tamang edad ang nagdarasal araw-araw, habang 38% ang nagsisimba linggo-linggo.
Sa survey ng SWS sa 79% mga Katolikong respondente, lumabas umano na 34% ng mga Katoliko ang nagdarasal isang beses sa isang araw, habang 35% naman ang higit pa sa isang beses kada araw.
Samantala, 10% umano ang nananalangin maraming beses sa isang linggo, habang 6% ang isang beses sa isang linggo.
Nasa 4% naman daw ang nagdarasal dalawa hanggang tatlong beses sa isang buwan; mga 4% ang isa kada buwan; 2% ang halos isa sa isang linggo; at kapwa 1% para sa mga nagdarasal maraming beses sa isang taon, isa hanggang dalawa kada taon, mas mababa sa isa kada taon, at hindi nagdarasal kailanman.
PNP, nakasamsam ng tinatayang <b>₱20B halaga ng ilegal na droga sa buong 2024</b>
Ibinahagi rin ng survey ng SWS na 38% ng mga Katolikong Pinoy ang nagsisimba isa o higit pang beses sa isang linggo.
Nasa 24% naman ang dalawa o higit pa sa isang buwan; 20% ang isang beses sa isang buwan; 9% ang dalawang hanggang 11 beses kada taon; 7% ang isang beses sa isang taon, habang 3% umano ang hindi nagsisimba.
Samantala, 93% daw sa mga nagsisimba ay personal na pumupunta sa simbahan para lumahok sa misa; 3% ang nagsisimba sa pamamagitan ng panonood ng misa sa telebisyon o online, habang 2% naman ang minsang personal na nagpupunta sa simbahan at minsang nakikimisa sa pamamagitan ng telebisyon o online.
Isinagawa ang nasabing survey mula Disyembre 10 hanggang 14, 2022, sa pamamagitan ng personal na pakikipanayam sa 1,200 indibidwal na ang edad ay 18 pataas. May sample error margin itong ±2.8%.
