Patuloy na makararanas ng pag-ulan ang malaking bahagi ng bansa ngayong Biyernes, Pebrero 17, dulot ng trough ng low pressure area (LPA) at northeast monsoon o amihan, ayon sa Philippine Atmospheric, Geophysical and Astronomical Services Administration (PAGASA).
Sa tala ng PAGASA kaninang 4:00 ng madaling araw, namataan ang LPA sa layong 765 kilometro sa silangan timog-silangan ng Hinatuan, Surigao del Sur.
Kaya naman, magkakaroon ng maulap na may kalat-kalat na pag-ulan at thunderstorms sa Eastern Visayas, Northern Mindanao, Caraga, Davao Region, at Bohol bunsod ng trough ng LPA.
Magkakaroon din ng maulap na may pag-ulan sa Cagayan Valley, Cordillera Administrative Region, Bicol Region, Aurora, at Quezon dahil naman sa amihan.
Ping Lacson, kinilala ambag nina PNoy, PBBM sa estado ng kaso ni Mary Jane Veloso
Pinag-iingat ng PAGASA ang mga nasabing lugar dahil maaari umanong makaranas ng pagbaha o kaya naman ay pagguho ng lupa dulot ng katamtaman hanggang sa malakas na pag-ulan.
Samantala, magiging medyo maulap hanggang sa maulap na may kasamang katamtamang pag-ulan sa Metro Manila at mga natitirang bahagi ng bansa bunsod ng amihan. Wala namang inaasahang malaking epekto ang pag-ulan dito.
Makarararanas naman ng medyo maulap hanggang sa maulap na may panaka-nakang pag-ulan o thunderstorms sa mga natitirang bahagi ng Mindanao dahil sa localized thunderstorms. Posible rin ang pagbaha o kaya naman ay pagguho ng lupa rito tuwing magkakaroon ng malakas na thunderstorms.
