Tinatayang aabot sa ₱7 milyong halaga ng puslit na produktong petrolyo ang nabisto habang ibinibiyahe ng 10 tripulanteng sakay ng isang barko sa karagatang sakop ng Tawi-Tawi nitong Sabado ng madaling araw.
Kinilala ni Area Police Command-Western Mindanao operations chief, Col. Richard Verceles, ang mga inaresto na sina Kashmeer Abao, 41; Sajid Hassan, 51; Jimmy Pulahan, 48 Hadji Caesar Utuali, 65; Hadji Manuel Kesun, 64; Te Teteng Meran, 32; Gurano Japar, 42; Jamala Hussin, 18; Kolongan Nasilin, 52; at, Raymond Abdul, 23.
Naharang ng mga miyembro ng Police Maritime Group ang kargamento lulan ng ML Shaira sa karagatang sakop ng Tandubas, Tawi-Tawi nitong Enero 28, dakong 3:30 ng madaling araw.
Karga ng nasabing barko ang 590 drum ng petroleum products na aabot sa ₱7 milyon, ayon kay Verceles.
Sa report, natuklasan na nagmula sa Malaysia ang barko at patungo na sana sa Zamboanga City nang masabat ng pulisya.
Matapos ang isang buwan: Bangkay ng dalagitang natabunan ng landslide, narekober na!
Under custody na ng Police Maritime Group sa Bongao, Tawi-Tawi ang mga suspek na nahaharap sa kaukulang kaso.
Philippine News Agency
