Sabi nga, mababanaag sa hitsura ng isang pet kung inaalagaan ba siyang mabuti at minamahal ng kaniyang fur parent. Iyan ang pinatunayan ng isang netizen na nagngangalang "Jhenna Meliza Calma" matapos niyang i-flex ang kamangha-manghang transpormasyon ng isang kuting na kaniyang inampon, matapos maispatang pagala-gala sa kalsada.
Ayon sa Facebook post ni Calma, noon daw ay nakita niya ang kuting na ginaw na ginaw, gutom, at uhaw habang nasa kalsada, isang gabing umuulan. Kinabukasan daw, nasa lugar pa rin na kaniyang pinagkitaan dito ang kaawa-awang kuting. Kaya ang ginawa ng netizen ay kinuha na lamang niya ito at iniuwi sa bahay.
"Ganda mo! Ang dungis mo lang 😂"
"Eto ung nakita ko isang gabi umuulan, nilalamig sa gilid ng kalsada gutom na gutom at uhaw, sobrang dungis at payat 😔Iniwanan ko ng pagkain. Kinabukasan chineck ko, nandun pa rin siya. Kaya di na ko nakatiis kinuha ko na lang 😅"
ALAMIN: 10 bansang hindi nagdiriwang ng Pasko
Wala raw gustong umampon sa kuting kaya siya na lamang ang nag-alaga rito.
Makalipas ang ilang buwan, ibang-iba na ang hitsura ngayon ng pusa at talaga namang lutang na lutang ang ganda! Agaw-pansin ang blue eyes nito at puting-puting balahibo.
"Walang gustong mag-ampon sa kaniya noon dahil sa ichura niya pero tignan mo naman kung gaano kaganda sya ngayon partida wala pang ligo 'yan," saad ni Calma.
Umani naman ito ng positibong reaksiyon at komento mula sa mga netizen, at nagpasalamat sila kay Calma sa kabutihan nito sa pusa.
