Magandang balita dahil umaabot na sa 65 ang mga bagon ng Metro Rail Transit Line 3 (MRT-3) na na-overhaul na.
Sa abiso ng MRT-3, nabatid na tumaas sa 65 ang bilang ng light rail vehicles (LRVs) na na-overhaul ng MRT-3 matapos na madagdagan pa ng isa noong Setyembre 28.
“MAGANDANG BALITA!Bilang ng mga na-overhaul na bagon ng MRT-3, tumaas na sa 65!” anunsiyo pa ng MRT-3.
“Tumaas na sa 65 ang bilang ng mga na-overhaul na light rail vehicles (LRVs) o bagon ng Metro Rail Transit-3 (MRT-3), matapos madagdagan ng isa pa nitong ika-28 ng katatapos na buwan,” anito pa.
Ayon sa MRT-3, sa ilalim ng overhauling, kinukumpuni at pinapalitan ng bago ang mga lumang piyesa ng mga bagon ng MRT-3.
8 bagong electric buses na may CCTV, free Wi-Fi, aarangkada na sa QC
Isinasailalim din ang mga ito sa mga serye ng system checks upang matiyak na ligtas silang ibiyahe.
Nabatid na sa kabuuan, pito na lamang mula sa 72 bagon ng MRT-3 ang nakatakdang isailalim sa general overhauling ng maintenance provider ng linya na Sumitomo-MHI-TESP.
Ang MRT-3 na bumabaybay sa kahabaan ng EDSA, ang siyang nag-uugnay sa North Avenue, Quezon at Taft Avenue, Pasay City.
