Umaabot na sa mahigit 18.6 milyon ang bilang ng mga estudyanteng nakapagpatala na para sa School Year 2022-2023.
Sa isang pulong balitaan nitong Miyerkules, iniulat ni DepEd Spokesperson Michael Poa na ang naturang pigura ay nasa 64% hanggang 67% na ng kanilang target na 28.6 milyong enrollees ngayong taon.
Muli rin namang hinikayat ni Poa ang mga magulang na ipa-enroll ng maaga ang kanilang mga anak upang matulungan ang mga paaralan sa ginagawang paghahanda para sa nalalapit na pasukan.
“Ang experience [kasi] natin in previous years, sa last day of enrollment and even during bukas na 'yong schools, tumatakbo 'yong klase, nag-e-enroll pa 'yong learners,” ani Poa.
TINGNAN: Listahan ng mga nag-file sa pagkasenador at party-list sa huling araw
Paliwanag niya, ang pagkakaroon ng konkretong enrollment figures ay malaking tulong sa DepEd upang makapagpatupad ng mga epektibong istratehiya laban sa COVID-19, dengue, monkeypox at sa North Luzon earthquake.
Ang enrollment period para sa SY 2022-2023 ay sinimulan noong Hulyo 25, 2022.
Inaasahang magtatapos ito sa Agosto 22, na siyang unang araw ng klase.
Ang limang araw na face-to-face classes naman ay sisimulan sa Nobyembre 2, 2022.
