Naalarma ang Commission on Higher Education (CHED) ukol sa mga ulat ng umano'y "instant doctorate degrees" na diumano'y iniaalok ng isang unibersidad, na nagsasabing nabahiran ng isyu ang reputasyon ng mga higher education institutions (HEIs) ng bansa.
Sinabi ni CHED Chairperson Prospero "Popoy" de Vera III na bumuo sila ng isang team para tumutok sa usapin, partikular sa mga ulat hinggil sa Adamson University.
"This report of an instant Ph.D. is very alarming and prejudicial to the international reputation of our Philippine HEIs. CHED will not condone any violation of existing laws and regulations, autonomous or not," ani de Vera III.
Dagdag pa niya na ang Adamson University ay itinuturing na autonomous, gayunpaman, maaari pa rin nilang tingnan ang usapin.
VP Sara, tahasang iginiit na hindi niya binoto si Romuadlez
Ayon pa kay de Vera III, bagama't malaya ang Adamson sa regular na pagsubaybay sa CHED bilang isang autonomous na institusyon, maaaring magsagawa ang CHED ng mga aktibidad sa pagsisiyasat kung sakaling may mga ulat ng pangkalahatang pagkasira ng kalidad o matinding paglabag sa mga batas, tuntunin, at regulasyon na makakaapekto sa mabuting katayuan ng Ang PHEI bilang isang kagalang-galang na institusyong pang-edukasyon.
Matatandaan na ayon sa ulat ng South China Morning Post nitong Hulyo 25, sinibak sa puwesto si Peng Xilin, party secretary ng Shaoyang University na matatagpuan sa Hunan province ng China, matapos niyang i-rehire ang 22 gurong ipinadala niya sa Adamson University sa Maynila, matapos nilang makapagtamo ng doctorate degree sa loob lamang daw ng 28 buwang pag-aaral, na karaniwan ay nakukuha ng minimum na apat hanggang limang taon. Ginawa umano ito ng university head para mapataas ang kanilang school ranking.
BASAHIN: University head sa China, sinibak sa posisyon dahil sa paggasta ng US$27M para sa ‘Instant PhD’
Agaran namang sumagot ang unibersidad na dawit sa isyu.
BASAHIN: Pamunuan ng Adamson University, sumagot na sa isyu ng pagkakadawit sa ‘Instant PhD’
"In light of recent news, Adamson University strongly denounces the malicious claims perpetrated by certain sectors in Hunan Province, China, on the PhD degress obtained by Shaoyang College faculty members from Adamson University," anang unibersidad.
Idinagdag nito na ang paaralan ay mahigpit na sumusunod sa mga alituntunin ng CHED, lalo na ang paghingi ng anim na terminong paninirahan, na itinatampok ang "stringent verification procedure."
Sa nasabing ulat, isang Peng Xilin, na sinasabing kalihim ng partido ng Shaoyang University, ay sinibak dahil sa muling pagkuha ng 22 guro na nagtapos umano ng kanilang doctorate sa Adamson University sa loob lamang ng 28 buwan.
Binatikos ng mga awtoridad sa edukasyong panlalawigan si Peng dahil sa pagiging "unscientific" at "imprecise."
Idinagdag nito na humigit-kumulang USD27 milyon ang ginastos ng opisyal ng paaralang Tsino para tustusan ang mga guro na umano'y nakakuha ng "instant Ph.D."
