Patay ang dalawang lalaking magkaangkas sa motorsiklo matapos na makabanggaan ang isangtrailer truck sa Ermita, Manila nitong Martes, Hulyo 12.
Kapwa agad na binawian ng buhay ang mga biktimang sina Jake Tiburania, na siyang nagmamaneho sa motorsiklo, at residente ng Vicente St., Pineda, Pasig City, gayundin ang kanyang backride na si Brix Deuna Urot, ng Rodriguez, Rizal.
Samantala, arestado naman ang suspek na si Randy Layda ng Tanza, Cavite at siyang nagmamaneho ng isang trailer truck na may plakang DCQ-6565.
Batay sa ulat ng Vehicular Traffic Investigation Section (VTIS) ng Manila Police District (MPD), naganap ang insidente dakong alas -3:15 ng madaling araw sa panulukan ng United Nations Avenue at San Marcelino St. sa Ermita.
49 na senatorial aspirants, naghain ng COC ngayong Oct. 7
Lumilitaw na binabagtas ng mga biktima ang westbound ng UN Avenue, sakay ng isang Honda motorcycle, nang pagsapit sa kanto ng San Marcelino St., ay makabanggaan nito ang trailer truck ni Layda na noon ay bumabagtas naman sa San Marcelino St. patungo sa San Andres area.
Sa tindi ng impact nang banggaan ay tumilapon umano ng ilang metro ang mga biktima na nagresulta sa kanilang agarang kamatayan.
Nakapiit naman na ang suspek na sasampahan ng dalawang bilang ng kasong reckless imprudence resulting in homicide at damage to property sa piskalya.
