Isa ang Kapuso actor na si Rodjun Cruz sa mga hayagang bumati kay President-elect Bongbong Marcos Jr. kasunod ng opisyal na proklamasyon ng Kongreso noong Miyekoles, Mayo 25.

Kilala bilang isa sa celebrity supporters ng UniTeam tandem kasama ang ngayo’y Vice President-elect Inday Sara Duterte si Rodjun. Ilang campaign rallies din ang dinaluhan ng aktor kabilang ang star-studded Cebu grand rally nina Marcos Jr.

Basahin: Grand rally ng UniTeam sa Cebu bukas, dudumugin ng ilang celebrities, kilalang banda – Balita – Tagalog Newspaper Tabloid

Isang Instagram post ang ibinahagi ng aktor, Huwebes, Mayo 26.

“Mr. President-elect @bongbongmarcos & Vice President-elect @indaysaraduterte, Congratulations po sa inyo!🎉🇵🇭” ani Rodjun sa kanyang IG post kalakip ang mga larawana kasama ang manunungkulang dalawang pinakamataas na opisyal ng bansa sa susunod na anim na taon.

Kumpiyansa naman ang aktor na gagampanan ng tandem ang kanilang mga tungkulin para sa kapakanan ng bansa.

“Alam ko po na gagawin niyo ang lahat para sa mas ikauunlad at ikagaganda ng ating bansang Pilipinas. Ipagdadasal po namin kayo. God bless you both always!🙏🏻”

Umani na ng mahigit 20,000 likes ang IG post na ito ni Rodjun sa pag-uulat.