Ibinunyag ni Senator Aquilino “Koko” Pimentel III nitong Miyerkules na masigasig niyang pamumunuan ang Senate minority leadership post at sinabing tatalakayin niya ang usapin kasama si opposition Senator Risa Hontiveros bago ang pagbubukas ng 19th Congress.
Gayunman, sinabi ni Pimentel na hihintayin niya ang mga papasok na senador na sasapi sa majority bloc na ayusin muna ang kanilang hanay bago pag-usapan ng minority bloc ang kanilang mga plano.
Nauna nang sinabi ni Pimentel na hilig niyang sumali sa minority bloc. Si Hontiveros, sa kabilang banda, ay naging miyembro ng Senate minority bloc at nanalo sa isang reelection bid noong nakaraang May 2022 senatorial polls.
“Pabayaan namin ang majority, magbuo muna kayo. Kasi ang hindi sasali sa kanila will be the minority. Then we organize ourselves. Tingnan namin,” ani Pimentel sa Kapihan sa Manila Bay virtual forum.
VP Sara, hindi 'isang kaibigan' si PBBM; nagkakilala lang dahil sa eleksyon
“Ewan ko kay Risa pero mag-uusap kami ni Risa. Alam naman din ni Risa na una sa lahat abogado ako. Number two, siyempre Senate rules are involved,” aniya.
“Naging Senate president din naman ako. I dealt with the Senate rules, and then number three, mas matanda ako sa kanya. So, dagdag mo na yon,” dagdag ni Pimentel.
Bilang bahagi ng papasok na Senate minority bloc, sinabi ni Pimentel na titiyakin niyang magkakaroon ng checks and balances sa Upper Chamber. Nangako siya na susubaybayan kung ang mga panuntunan ng Senado ay sinusunod ng karamihan, kung ang mga panukalang batas na inihain ay naaayon sa 1987 Constitution at kung ang oras ng Senado ay ginugugol sa mga kagyat na bagay at hakbang.
“I want to be sure that structurally, there would be a segment of the Senate which will check the greater majority. But when I say ‘checks’, it doesn’t mean we will always be on the opposite side,” pagpupunto ng senador.
Ibinunyag naman ni Sen. Sonny Angara na bukas sina Sen. Pia Cayetano at presumptive Senator Alan Peter Cayetano na sumali sa Senate minority bloc sa 19th Congress.
“I think they are also open to being in the minority bloc,” ani Angara sa parehong forum.
Gaya ni Pimentel, sinabi ni Angara na naniniwala siyang hindi didiktahan ng sinuman ang papasok na senador.
“He’s been speaker of the House, he’s been a majority leader. So I don’t think he will be dictated upon by anyone. He’s clearly one of the most independent senators I know,” sabi ni Angara.
Hannah Torregoza
