Hiniling ng kampo ni Vice President Leni Robredo sa mga tagasuporta nitong Linggo, Marso 6, na huwag magsawa sa pangangampanya para sa presidential aspirant kasunod ng mga alegasyon ng “hakot,” o ang pagbabayad ng mga tao para dumalo sa mga campaign rally, pagkatapos dumugin ang kanilang Cavite at Bulacan sorties.
Nagpahayag ng pasasalamat ang tagapagsalita ni Robredo na si Barry Gutierrez sa mga tagasuporta nila dahil hindi magiging posible ang "people’s campaign" kung wala ang kanilang mga kontribusyon.
“Kung wala ito, hindi siguro tayo aabot sa puntong ito. At dito sa naiiwang 64 days, sana wag tayong mapagod. Sana patuloy lang,” aniya sa weekly radio show ni Robredo.
“Iyong pagpunta sa mga venue, talagang iyong mga tao ay naglalakad, talaga sila ang nagkukusang pumunta diyan. Walang hakot-hakot sa mga rally na ito,” dagdag ni Gutierrez.
UP, top university pa rin sa Pinas; Iba pang paaralan sa bansa, pasok sa Asian ranking!
Matagumpay na nagsagawa ng mga rally si Robredo na umani ng libu-libong tagasuporta sa Cebu at Iloilo noong nakaraang linggo. Noong Biyernes, Marso 4, dinaig ng Cavite ang iba pang mga lalawigan na may higit sa 47,000 dumalo, habang ang Bulacan ay nag-host ng 45,000 tagasuporta noong Sabado, Marso 5.
Ngunit si Cavite Rep. Boying Remulla, isang kilalang tagasuporta ni dating Senador Ferdinand Marcos Jr., ay nagsabi sa isang palabas sa radyo sa dzRH na ang mga tagasuporta na naka-pink ay binayaran ng P500 at binigyan ng bigas para dumalo sa rally sa kanyang bayan, Cavite.
Nauna rito, nangako kay Marcos ng 800,000 boto ang kanyang kapatid na si Cavite Gov. Jonvic Remulla mula sa vote-rich province. Bilang protesta, ang mga tagasuporta ni Robredo ay nagsuot ng mga kamiseta na nagsasabing "800K Minus One" sa rally noong Biyernes.
Sa Twitter, ang hashtag na #BoyingSinungaling ang nangungunang trending topic na may 19,200 tweets sa pag-uulat.
Sinabi ni Gutierrez na hindi inaasahan ang pagbuhos ng suporta para sa Bise Presidente, ang nag-iisang babaeng presidential aspirant nitong Mayo 2022.
Binigyang-diin niya na marami sa mga probinsiyang binisita ni Robredo ay hindi niya baluwarte. Natalo si Robredo sa Cavite noong 2016 ng 150,000 boto.
“Sobra akong natutuwa na talagang makita na palaki nang palaki pa lalo ‘yung mga rally na ginagawa dahil iyan talaga ang ating magpapanalo. Iyong paglabas ng mga tao, iyong pagkilos ng ating mga supporters at volunteers, iyong walang pagod nilang pagkilos para sa kampanyang ito,” dagdag ni Gutierrez.
Hindi nila akalain na aabot sa puntong ito ang people’s campaign, aniya, dahil ipinagdarasal lang nila na sana ay lumabas ang mga tao para suportahan ang kandidatura ng bise-presidente.
“Pero yun level na nakikita natin tingin ko walang mag-expect ng ganito maski si VP Leni,’ pag-amin niya.
Raymund Antonio
