Sa kabila ng inaasahang pag-alis sa liga ng Alaska Aces, hindi pa rin nagpaapekto ang mga manlalaro nito matapos talunin ang Terrafirma Dyip, 102-97 sa pagpapatuloy ng PBA Governors' Cup sa Smart-Araneta Coliseum nitong Sabado.
Nanguna sa mga lokal si Jeron Teng sa kanyang career-high na 30 puntos na nagpapatatag sa kartada ng Alaska na 5-2, panalo-talo.
Nasa ikatlong puwesto na ang Ace dahil nangunguna pa rin sa liga ang Magnolia sa malinis na kartadang 5-0 kasunod ang Meralco, 4-1, panalo-talo.
Tampok din sa pagkapanalo ng Alaska ang malaking ambag nina Abu Tratter, Allyn Bulanadi, at RK Ilagan.
'Pikon daw?' UAAP fan na nag-dirty finger, agaw-eksena sa San Juan Arena!
Saludo rin si Alaska coach Jeff Cariaso sa mga bench players na nagbigay ng init sa laban matapos silang tambakan ng Dyip, 83-66 matapos ang ikatlong yugto ng laban.
“Being down 17 was really because our poor defense and us giving the confidence. I like to give credit to the guys that just came off the bench who normally don’t get a lot of minutes. Our bench really played well tonight,” banggit ni Cariaso.
Hindi naman napakinabangan ng Terrafirma ang triple-double ng import na si Antonio Hester na may 24 puntos, 14 rebounds, at 11 assists at 21 puntos ni Joshua Munzon matapos mag-collapse ang kanilang depensa sa fourth quarter.
