Isa si Margielyn Didal, 22-anyos na tubong Cebu City, sa mga Pinay na atleta na lumaban sa 2020 Tokyo Olympics ngayong taon.

Nakuha niya ang ikapitong puwesto sa women’s street skateboarding na ginanap sa Ariake Urban Sports Park sa Tokyo, Japan nitong Hulyo 26.

Akari Sports wala pang balak pasukin ang PBA

Noon pa man, mataas na pangarap niyang makamit ang tagumpay sa larangan ng skateboarding.

Ang kanyang tatay ay isang karpintero habang sidewalk vendor naman ang kanyang nanay.

Sa kanyang kuwentong itinampok sa “Rated K” noong 2018, tinutulungan ni Margielyn ang kanyang nanay sa pagbebenta ng dyaryo at minsan ay nagbabarker ito. Sa mga kinikita nila, nagtatabi siya palagi ng singkwenta pesos para mayroon siyang pang renta ng skateboard.

Nang makilala siya ng kanyang naging coach at manager, tuloy-tuloy na ang naging tagumpay ni Margielyn.

Nakamit niya ang gintong medalya noong 2018 Asian Games women’s skateboarding street event. Bukod sa medalya, nakatanggap siya ng incentive na nagkakahalagang P6 milyon mula sa gobyerno at public patrons na nakatulong sa kanyang pamilya.

Hindi man niya nakamit ang gintong medalya sa Tokyo Olympics ngunit umingay ang pangalan niya sa buong mundo dahil sa kanyang “sportmanship."

Nag-viral ang mga larawan nito na mistulang nag “photobomb” sa mga larawan ng ilang mga atleta.

Maging ang “all smiles” na larawan niya ay umani ng positibong komento sa mga netizens dahil hindi man nakamit ang gintong medalya ay mukhang masaya pa rin ito.

Kaya naman nakuha nito ang mataas na respeto at mas hinangaan siya ng mga tao. Naging inspirasyon din siya ng ilang mga kabataan na nais din sumabak sa larangan ng skateboarding.

Ibinahagi ni Margielyn sa kanyang Instagram na sana, aniya, ay magkaroon na ng maayos na skatepark sa Pilipinas para maibahagi niya kung gaano kasaya ang skateboarding.