Umabot sa 13.6 porsyento ng populasyon o 3.4 milyong pamilyang Pinoy ang nakaranas ng gutom sa nakaraang tatlong buwan.

Ito ang ulat ng Social Weather Stations (SWS) batay sa isinagawang survey mula Hunyo 23 hanggang 26.

Ang nasabing bahagdan ay mas mababa ng 3.2 kumpara sa 16.8 porsyento nitong Mayo kung saan ay mas mababa pa rin ito ng 7.5 porsyento sa taunang tala noong 2020 na 21.1 porsyento.

Sa 13.6 porsyento na pamilya, aabot sa 11.5 porsyento o 2.9 milyon ang nakaranas ng “moderate hunger” habang 2.1 porsyento o 524,000 pamilya ang nakaranas naman ng “severe hunger.”

National

Research vessels ng BFAR, binomba ng tubig at ginitgit ng Chinese Coast Guard

Sa naturang survey, ang mga nakaranas ng “moderate hunger” ay ang mga pamilyang nagutom ng isa o hanggang dalawang beses sa nakaraang tatlong buwan, samantalang ang mga nakaranas naman ng “sever hunger” ay ang mga pamilyang nagutom nang mas madalas o palagi sa nakaraang tatlong buwan.

Isinagawa ang survey sa pamamagitan ng face-to-face na pagtatanong sa 1,200 na Pilipino o tig-300 residenteng mula sa Metro Manila, Balance Luzon, Visayas, at Mindanao. 

Beth Camia