Hinikayat muli ni Food and Drug Administration (FDA) director-general Eric Domingo ang publiko na magpabakuna na laban sa COVID-19, anumang brand ito ng bakuna, upang maprotektahan sila laban sa mas nakahahawang Delta COVID-19 variant.
Sa isang taped public briefing, tiniyak rin ni Domingo sa publiko na ang lahat ng COVID-19 shots na available sa bansa, iba-iba man ang efficacy level ng mga ito, ay makapagbibigay ng proteksyon sa mga Pinoy laban sa Delta strain.
Ayon kay Domingo, ang Pfizer vaccine ay may 93% efficacy rate laban sa Alpha variant na unang natukoy sa UK habang 88% naman itong epektibo laban sa Delta strain, na unang natuklasan sa India.
Aniya pa, ang AstraZeneca naman ay may 66% efficacy rate laban sa Alpha variant habang 60% naman ang bisa nito laban sa Delta variant.
Dagdag pa niya, ang Moderna at Johnson & Johnson ay mayroong 80% efficacy rate laban sa Delta variant. Samantala, ang iba pang drugmakers gaya ng Sinovac at Sinopharm ay nagsasagawa pa ng efficacy trials laban sa naturang strain.
Kawatang tumalon sa second floor, timbog matapos bumagsak sa harap ng brgy. tanod
“There's a decreasing efficacy as we get more mutations but hindi naman po nawawala ang bisa ng bakuna. It's still a useful vaccine,” pagtiyak pa ni Domingo.
Mary Ann Santiago
