Nakapagtala pa ang Department of Health (DOH) ng 5,484 pang bagong kaso ng COVID-19 sa bansa nitong Huwebes, Hulyo 8, 2021.
Batay sa case bulletin no. 481 na inilabas ng DOH dakong 4:00 ng hapon nitong Hulyo 8, nabatid na dahil sa naturang bagong mga kaso ay umaabot na ngayon sa 1,455,585 ang total confirmed COVID-19 cases sa bansa.
Gayunman, 49,036 na lamang sa mga ito ang aktibong kaso pa o 3.4% ng kabuuang bilang ng COVID-19 cases sa bansa.
Sa mga aktibong kaso naman, 90.9% ang mild cases lamang; 3.7% ang asymptomatic; 2.2% ang severe; 1.62% ang moderate at 1.5% ang critical cases.
Rep. Acidre, hinamon si Roque na tulungan OFWs na naaresto sa Qatar
Samantala, nakapagtala rin naman ang DOH ng 3,925 na bagong gumaling sa karamdaman kaya’t umaabot na ngayon sa 1,380,899 ang total COVID-19 recoveries sa bansa o 94.9% ng total cases.
Mayroon din namang 191 pasyente ang sinawimpalad na nadagdag sa bilang ng mga binawian ng buhay dahil sa karamdaman.
Sanhi nito, 25,650 na ang COVID-19 death toll sa bansa o 1.76% ng total cases.
Mary Ann Santiago
