CAMP VICENTE LIM, Canlubang, Laguna - Napatay ng nagselos na lalaki ang kanyang live-in partner at ang pinagselosang lalaki nang pagsasaksakin ang mga ito sa Barangay Castillo sa Padre Garcia, Batangas, nitong Miyerkules ng gabi.

Ayon sa ulat ng Police Regional Office 4, ang mga biktima ay nakilalang sina Victorino Gonzales, driver at taga-Brgy. Sampaloc 2, Sariaya, Quezon at Carmen Coldas, 42 at taga-Brgy. Castillo, Padre Garcia, Batangas.

Kaagad namang tumakas ang suspek na live-partner ni Coldas na si Freddie Villegas, 43, taga-Brgy. Castillo, Padre Garcia, Batangas.

Sa police report, dakong 9:10 ng gabi nang magtungo ang suspek at si Coldas sa bahay ng isang Elino Caringal kung saan naroroon si Gonzales.

Bigla na lamang umanong pinagsasaksak ng suspek si Gonzales at habang pinipigilan ito ni Coldas ay siya naman ang pinagbalingang saksakin.

Isinugod ang dalawa sa Dr. R. Rosales Memorial Medical Center, gayunman, binawian din sila ng buhay.

Sinabi ng pulisya, nagseselos umano ang suspek kay Gonzales na naging sanhi ng krimen.

Danny Estacio