nina Beth Camia at Genalyn Kabiling
Nasa landas na ang gobyerno sa pagkuha nito ng sapat na supply ng mga bakunang coronavirus sa bansa, ayon kay Cabinet Secretary Karlo Nograles.
Habang minarkahan ng bansa ang unang taon nito sa pandemic lockdown, tiniyak ni Nograles na mas maraming bakuna ang paparating na sa gitna ng pinaigting na pagsisikap ng gobyerno na mabakunahan ang 70 milyong mga Pilipino upang makamit ang herd immunity.
Sinimulan na ng gobyerno ang pagbabakuna nito noong Marso 1, naturukan ng COVID-19 vaccine ang mahigit 100,000 health workers sa ngayon.
PBBM, bukas sa pakikipag-dayalogo sa labor groups para sa umento sa sahod – Usec. Castro
“We have taken concrete steps forward in our efforts to beat COVID-19, the first step of which is the vaccination of our country’s health workers,” sinabi ni Nograles sa isang pahayag sa BALITA.
“The government is now on track to secure enough vaccine doses to inoculate 70 million of our countrymen––the number needed to achieve herd immunity,” dagdag niya.
Ang dating kongresista ng Davao ay nagsisilbing co-chair ng Inter-Agency Task Force for the Management of Infectious Diseases, ang policy-making body ng gobyerno sa pagtugon sa pandemya.
Nitong Lunes, Marso 15, inihayag ni vaccine czar Carlito Galvez Jr. na inaasahang makakatanggap ang bansa ng halos 2.3 milyong dosis ng bakuna ng COVID-19 sa buwan na ito o sa simula ng Abril.
Ayon kay Galvez, humigit-kumulang sa 1.4 milyong dosis ng bakuna mula sa Sinovac ng China at 979,200 AstraZeneca shot ay inaasahang darating alinman sa huli ng Marso o unang bahagi ng Abril.
Nasa 1.1 milyong dosis ng mga bakuna - 600,000 dosis ng Sinovac na ibinigay ng China at 525,600 AstraZeneca na dosis mula sa pasilidad ng COVAX - ay nakarating sa bansa sa ngayon. Halos 90 porsyento ng mga dosis ang naipamahagi sa mga manggagawa sa kalusugan sa buong bansa.
Limitadong supply
Samantala, inamin ng Malacanang na kailangang bilisan ang vaccination program ng pamahalaan upang maabot ang target na 50–70 milyong Filipinong mababakunahan ngayong 2021.
Ito ang reaksyon ni Presidential Spokesperson Harry Roque sa puna ni Senator Panfilo Lacson na mabagal ang usad ng pagbabakuna ng gobyerno.
Ayon sa kalihim, maaari namang bilisan pa ang pagbabakuna, bagaman batid naman ng lahat na limitado pa ang supply ng bakuna sa bansa.
Aniya, posibleng nakapagpabagal rin sa pagbabakuna ay ang pagbibigay ng karapatan sa mga healthworkers na makapamili ng gusto nilang brand ng bakuna.
