LIMITADO na ang pagpapapasok ng mga bisita sa idineklarang tarsier sanctuary sa Mt. Matutum sa South Cotabato, upang maproteksyunan ang mga hayop at ang kanilang tirahan.

Sa pagbabahagi ni Forester Gabriel Baute, area superintendent ng Mt. Matutum Protected Landscape (MMPL), inihinto nila, aniya, ang pagtanggap ng walk-in visitors sa sanctuary na matatagpuan sa Barangay Linan, Tupi mula nitong holiday seasn bilang bahagi ng kanilang enhanced conservation and protection program.

Aniya, ang pagdami ng mga bisita sa lugar ay maaaring makagambala sa mga tarsiers, ang tinaguriang world’s smallest primate, at magbigay-banta sa kanilang tirahan.

Nabanggit din ni Baute na ang mga tarsiers ay nocturnal animals, na kalimitang tulog sa umaga at gising sa gabi, tulad ng mga kuwago.

“Hence, visitors are enjoined to avoid disturbing these animals in their natural habitat or when visiting the tarsier sanctuary,” pagbabahagi niya.

Ngunit tulad din ng mga wildlife species, pinakamainam sa mga hayop na ito ang hayaang mamuhay sa kanilang natural na tirahan sa halip na hulihin at gawing alaga.

Kinilala ang mga tarsiers sa pagpapakamatay kung nahuhuli sila at kung na-e-expose sa mga ‘stressors’ tulad ng camera flash, human touch, at iba pang uri ng paggambala, aniya.

Nakalista rin ito sa ilalim ng “near threatened species” ng International Union for the Conservation of Nature.

Bilang tugon naman sa hakbang, pinasimulan ng lokal na pamahalaan ng Tupi ang programa na tinawag na “voluntourism,” na artikular na nagsusulong ng kaalaman sa proteksyon ng mga tarsiers at ang kanilang tirahan.

Sa kasalukuyan, tanging mga pre-arranged schedules lamang ang pinapayagan ng Municipal Environment and Natural Resources Office (Menro) sa mga bisita.

Sa pamamagitan naman ng naturang programa, ayon kay Rolando Visaya, Tupi Menro chief, naisusulong nito ang prinsipyo ng pagkakawanggawa at responsible tourism.

Bukod pa rito, nakatutulong din ang programa, sa paghihikayat sa mga bisita na magtanim ng mga puno sa mga lugar.

“This gives our visitors the opportunity to see the tarsiers in their natural habitat and at the same time take part in protecting them,”aniya.