CAPAS, Tarlac -- Sisikapin ng Pilipinas na wakasan ang 10 taong pagkauhaw sa gintong medalya sa pagsisimula ng swimming competition ngayon sa ikatlong araw ng aksiyon sa 30th Southeast Asian Games (SEAG) na gaganapin sa New Clark City Aquatic Center dito.
Pitong gintong medalya ang nakataya sa unang araw ng bakbakan kung saan susubukan ng mga pambatong Filipino-Americans na sina James Deiparine at Remedy Rule na makasisid ng ginto para sa mga Pilipino sa kanilang pagsabak ganap na 9:00 ng umaga.
Unang lalangoy si Rule sa kanyang pagsabak sa women’s 200-meter butterfly heats ganap na alas- 9:35 ng umaga, habang si Deiparine, double silver medalist sa nakaraang edisyon ng biennial meet noong 2017 ay sasabak sa ganap na 10:10 ng umaga para sa men’s 100-meter breaststroke heats.
Empleyadong lasing, patay matapos sapakin ng ginising na katrabaho
Tangan ni Rule ang Philippine record sa 200 butterfly sa kanyang naitalang 2:11.38 sa World Swimming Championships sa Gwangju, South Korea.
Sasabak din si Rule sa women’s 100-meter freestyle, kasama ang two-time Olympian na si Jasmine Alkhaldi ganap na 10:20 ng umaga.
Si Deiparine, naman, bukod sa silver medals na kanyang nakuha sa nakaraang SEA Games, tangan din niya ang Philippine record sa breaststroke na 1:02.00.
Sina Jessie Khing Lacuna at Miguel Barreto ang magsisimula ng kampanya para sa Philipinas sa men’s 400-meter freestyle sa alas- 9 ng umaga at sa men’s 1,500-meter freestyle.
Sasabak din para sa Pilipinas sina Jonathan Cook sa men’s 100-meter breast stroke, Jerard Jacinto at Jaden Olson sa men’s 100-meter backstroke, Jean Pierre Khouzam, Barreto, Lacuna, Maurice Sacho Illustre sa men’s 4x200-meter relay, Rosalee Sta. Ana sa women’s 200 fly at Chloe Isleta at si Xiandi Chua sa women’s 200 individual medley.
Huling nakatikim ng gintong medalya ang Pilipinas sa swimming noong 2009 SEAG sa pamamagitan ni Miguel Molina na nagwagi ng dalawang ginto buhat sa men’s 200 at 400-meter individual medley habang sina Daniel Coakley at Ryan Arabejo naman ay nag-ambag ng tig-isang ginto para sa mga events na the men’s 50-meter freestyle at men’s 1,500-meter freestyle, ayon sa pagkakasunod.
Annie Abad
