PINANGUNAHAN ni Philippine Sports Commission (PSC) Chairman William "Butch" Ramirez ang pagbati at pagsalubong sa mga sports minister mula sa mga miyembrong bansa para sa 5th ASEAN Ministerial Meeting (AMMS-5) on Sports at Senior Officials Meeting on Sports (SOMS-9) kahapon sa Sofitel Hotel sa Pasay City.
Layon ng naturang event na higit pang mapagtibay ang pagkakaisa ng mga kasaping bansa upang maipagpatuloy ang pagpapalawig sa palakasan sa buong ASEAN region.
Dumating sa bansa ang mga pinuno ng mga bansang miyembro ng ASEAN na sina His Excellency Sar Sokha ng Cambodia; Mr. Phouvanh Vongsouthi ng Lao PDR; Mr. Tan Wei Ming ng Singapore; Ahmad Shapawi Bin Ismail, ng Malaysia; His Excellency Aminuddin Ihsan Pehn Dato HJ Abidin ng Brunei-Darussalam; Mr. Mya Than Htike, ng Myanmar; Mr. Kumekawa Hirokazu ng Japan; Ms. Le Thi Hoang Yen ng Vietnam; at His Excellency Phiphat Ratchakitprakarn ng Thailand.
Archdiocese of Manila, hindi mag-eendorso ng kandidato sa eleksyon
Tatalakayin sa nasabing pagpupulong ang implementasyon ng regional project at mga aktibidad batay sa ASEAN Work Plan on Sports para sa taong 2016 hanggang 2020, anghangarin na makapag-host para sa ASEAN FIFA World Cup, pagpapalaganap ng eSports SEA Foundation, at talakayan para sa mga napagkasunduan sa nakaraang AMMS at SOMS meeting.
“It will be a series of meetings set by the ASEAN secretariat themselves,” pahayag ni PSC Executive Director Merlita Ibay, head ng local organizing committee.
Magkakaroon ng iba't ibang kaganapan ngayong na may kinalaman sa SOMS-9 habang pamumunuan naman ni chairman Ramirez ang mga aktibidad sa Women in Sports at iba pa.
Makikibahagi din ang mga delegasyon buhat sa UNESCO, SEARADO, FIFA, UN Women, ASEAN Chess Federation, ASEAN Para Sports Federation, ASEAN Football Federation, at Right to Play Thailand Foundation.
Tatalakayin ni Ramirez ang pagpapalawig ng grassroots sports program ng Pilipinas sa naturang AMMS-5 conference. Annie Abad
