PINAGTIBAY ng Philippine Sports Commission (PSC) ang ugnayan sa mga local government units (LGUs) sa Mindanao sa pamamagitan ng pagsasagawa ng mga serye ng Sports for Peace program sa Maragusan, Compostela Valley at sa Bukidnon Province.
Pinasinayaan ni Maragusan Municipal Mayor Maricel Colina-Vendiola ang orientation ng Ate-Kuya volunteers na ginanap sa Mayor’s Conference Room nitong Setyembre 27, na sinundan ng Children’s Games na ginanap naman sa Maragusan Central Elementary School nitong Setyembre 28.
Malaking pasasalamat naman ang ipinaabot ni Mayor Vendiola, kay PSC Chairman William "Butch" Ramirez sa pagbibigay ng pagkakataon sa nasabing munisipalidad na maisagawa ang Children's Games.
Kahit nagpapagaling: Doc Willie Ong, pinapanalanging maging maayos na sina PBBM at VP Sara
"Maraming salamat po Chairman Butch dahil sa paghahatid po ninyo dito sa amin ng Children's Games at buong suporta po na ipinahatid po ng PSC. Maraming salamat po," pahayag ng Mayora.
Isang simple, ngunit makulay na opening ceremonies ang isinagawa bilang pagtanggap sa nasabing event na nilahokan ng kabuuang 200 kabataan at 20 Ate-Kuya volunteers.
"The colorful flaglets speak about the colors and vibrancy of the hosting," ayon naman kay PSC Mindanao cluster head na si Ed Fernandez.
Nagpamalas ng mga katutubong laro ang mga nasabing kabataan, gaya ng tug of peace, mukhang kamatis, sack race, hug relay at balloon race.
Sa Bukidnon Province naman ay ginanap ang PSC consultative sports planning nitong Setyembre 17 at 18 na nilahokan ng 26 partisipante buhat sa 12 munisipalidad.
Kasabay nito ay nagsagawa din ng mga grassroots coaching clinic sa table tennis, athletics, taekwondo, boxing, at badminton buhat Setyembre 17 hanggang 19.
Pinangunahan ni Governor Jose Ma. Zubiri, Jr. ng Bukidnon ang Children's Games na ginanap sa Folk Arts Theatre, Kaamulan Park, Malaybalay City na nilahukan naman ng 500 kabataan at inalalayan ng mga 50 Ate-Kuya volunteers. Annie Abad
