KINAPOS si Pinay world champion Rubilen Amit sa dikdikang duwelo kay Amber Chen ng Taiwan sa championship match sa katatapos na 32nd Japan 9-Ball Open sa New Pier Hall sa Tokyo, Japan.
Nakaungos si Chen kay Amit, 7-5, sa race-to-7, rack-your-own finals.
Bunga nito, naibulsa ni Chen ang ¥400,000 (Japanese Yen) top prize habang nagkasya naman si Amit sa ¥200,000 (Japanese Yen).
Bago makapasok sa finals, kinakailangan munang magwagi si Chen kay Miyuki Kuribayashi ng Japan, 7-4, sa final four duel para makapuwersa ng titular showdown kay Amit na dinaig naman si Angeline Magdalena Ticoalu ng Indonesia, 7-3, sa isa pang semifinal match.
Nasargo muna ni Amit ang 4-0 commanding lead bago nakabawi si Chen matapos maitumbok ang six straight racks para makapuro, 6-4, sa winner’s break format. Sa pagkakamali ni Chen sa 8-ball shot na nagbigay daan kay Amit para maidikit ang laban sa 6-5 count. May pagkakataon pa sana si Amit na maitabla ang laro at sa kanya pa sana ang deciding game pero nabigo siya sa 12 racks.
Ateneo, nanawagang itigil na pag-atake sa kanilang student-athletes, managers
Ang susunod na laban ni Amit ay sa China Open na gaganapin sa Shanghai, China mula Setyembre 1 hanggang 8.
Ang kampanya ni Amit sa Japan at China ay suportado ng Philippine Sports Commission at ng Billiard Sports Confederation of the Philippines sa magiting na pamumuno nina long-time billiards patron sportsman/businessman Aristeo “Putch” Puyat at DMC Entertainment and Production management boss Jesse Gonzales Cambosa Sr. bilang parte ng kanyang preparasyon sa nalalapit na Manila Southeast Asian Games.
