Inihayag ng presidential son na si Davao City 1st District Rep. Paolo “Pulong” Duterte ang planong niyang makasama sa mga pinagpipilian para maging susunod na Speaker of the House.

“Moapil na ‘ko pagka-Speaker (Sasali na ako sa Speakership race),” saad sa pahayag na ibinigay ng nakababatang Duterte sa mga mamamahayag sa Davao City ngayong Martes.

“The House is divided, I might be able to help unite it. Pareho lang kaming binoto ng mga tao, ah. Kung term sharing, term sharing na kaming lahat,” aniya.

Pagkilala sa kabayanihan ng OFWs, idadaan sa ‘Konsyerto sa Palasyo’

Una nang nagpahayag ang dating bise alkalde ng kawalan ng interes sa nasabing posisyon, pero dahil sa “term sharing” na isinusulong ni Taguig-Pateros Rep. Alan Peter Cayetano ay mistulang nagbago ng isip ang presidential son.

“I will ask the Visayas bloc to elect their Speaker for their term share, and so with the Mindanao bloc and the party-list coalition,” ani Pulong.

“We are not talking about two persons here. We are talking about our beloved country,” dagdag niya.

Kaugnay nito, wala namang linaw kung tototohanin ni Pangulong Rodrigo Duterte ang nauna niyang banta na magbibitiw sa puwesto kapag naghangad ang panganay niyang si Pulong na sumali sa Speakership race.

“We will wait for that happen kung totoong mangyari,” sabi ni Presidential Spokesman Salvador Panelo sa Palace press briefing tungkol sa resignation offer ng Presidente.

“But you know, you make a position, you make a stand on the basis of circumstances. When those circumstance change, you also change your stand. So puwede rin magbago. Puwede magbago ang isip ni Presidente, pwede magbago isip ni Congressman Duterte. Tingnan natin,” sabi pa ni Panelo.

Sa tanong kung seryiso ang Pangulo sa nasabing banta, sinabi ni Panelo: “Ang isang tao, ‘pag nagsalita ng isang bagay, seryoso ‘yun.”