DAVAO CITY – Fully-operational na ngayon ang pinakamalaking satellite-tracking antenna sa Pilipinas.

Inilunsad nitong Linggo, tinawag ng Davao GRS Ground Receiving Station (D-GRS) ang satellite-tracking antenna na Philippine Earth Data Resource and Observation (PEDRO) na may kaparehong gamit tulad ng unang GRS na ikinabit sa Department of Science and Technology-Advanced Science and Technology Institute (DOST-ASTI) sa Quezon City.

Ayon kay Harold Bryan Paler, Senior Science Research Specialist ng DOST- ASTI, malaking tungkol ang system lalo’t nagsisimula na ang bansa na dumepende sa space technology upang matugunan ang iba’t ibang kalamidad.

“This tracking system will take images of the affected areas. It will be processed and downloaded and will be distributed to the concerned disaster agencies,”ani Paler.

Idinesenyo ang system para makipag-ugnayan sa Earth observation satellites, kabilang ang Diwata-1 at Diwata-2 microsatellites na pag-aari ng Pilipinas, sa pamamagitan ng pagtanggap, pagproseso at pagbabahagi ng mga space-borne imagery.

Pagbabahagi pa ni Paler, may “broad range of optical (high-resolution, multispectral) and synthetic aperture radar (cloud-penetrating, day-night-imaging)” ang satellite data.

Bukod sa post-disaster images, gagamitin din ang D-GRS para sa agricultural monitoring, maritime surveillance at urban mapping.

Kumpara sa ASTI GRS sa Quezon City na may 3.7 meters, ang D-GRS ay may 7.3-meter satellite-tracking antenna, na mas kapaki-pakinabang sa pagda-download ng mga imahe sa “higher bandwidth.”

Sa pagbubukas ng D-GRS, inaasahang magbubukas ang reception, processing, at satellite data storage cycle ng mas maraming oportunidad upang maisulong ang panloob na inobasyon, at pag-abot sa mas maraming mga Pilipinong siyentista at mananaliksik.

Ang D-GRS ay itinayo sa Civil Aviation Authority Philippines Transmitter Facility sa Davao at itinatag ng DOST-XI and Department of Information and Communications Technology.