Mga Laro Ngayon

(Ynares Sports Center)

4:30 n.h. -- TNT vs Columbian Dyip

7:00 n.g. -- Blackwater vs Magnolia

Goodbye PBA? John Amores, tinanggalan na ng professional license!

TARGET ng Talk ‘N Text na bigyan ng hangin ang nauupos na kampanya sa playoff incentives sa pakikipagtuos sa Columbian Dyip sa opening match ng double-header ngayon sa 2019 PBA Philippine Cup sa Ynares Sports Center sa Antipolo City.

Nasa ikatlong posisyon sa kasalukuyan, hawak ang barahang 6-3, kaya pang tumabla ng Katropa sa No.2 spot na may kaakibat na twice-to-beat bonus sa quarterfinals gaya ng nakopo na ng No.1 team Phoenix. Kakailanganin ng Katropa na maipapanalo ang huling dalawang laro sa elimination round kabilang na ang tapatan nila ngayong 4:30 ng hapon ng Dyip.

Kasalukuyang okupado ng Rain or Shine Elasto Painters ang No.2 spot taglay ang kartadang 8-3.

Sakaling masilat ng Dyip na umaasa namang makakahabol sa huling upuan ng quarters, ang kasalukuyang pumapang-apat lamang na Barangay Ginebra (5-3) ang may nalalabing pag-asa na silatin sa Rain or Shine sa ikalawang puwesto kung mawawalis nito ang nalalabing tatlong laro sa preliminaries.

Hawak ang barahang 4-6, nagsosolo sa ikapitong posisyon, kailangang maipanalo ng Dyip ang laban ngayon kontra Katropa at umasang hindi lalagpas ng limang panalo ang mga sinusundang Magnolia, NLEX at Alaska na pawang may 4-5 marka.

Samantala, sa tampok na laro, sisikapin naman ng Magnolia na makalapit sa inaasam na playoff berth sa pagsagupa sa wala na sa kontensiyon na Blackwater ganap na 7:00 ng gabi.

Kababalik pa lamang ng Hotshots sa winning track matapos ang naitalang 103-90 panalo kontra Northport nitong Miyerkules sa Araneta Coliseum.

Hawak ang barahang 2-8 at wala ng pag-asang tumuntong ng quarterfinals, naghahanap na lamang ang Elite ng makakaramay sa maagang paghahanda para sa second conference.