Hinatulan kahapon ng Makati City Regional Trial Court (RTC) na makulong at magmulta si dating Rizal Commercial Banking Corporation (RCBC) Manager Maia Deguito dahil sa money laundering, kaugnay ng pagnanakaw ng $81 million sa Bangladesh Bank, noong 2016.
Ito ay matapos mapatunayan ng Makati RTC Branch 149 na guilty si Deguito sa walong bilang ng money laundering.
Bukod sa pitong taong pagkakakulong sa bawat bilang ng kaso, pinagmumulta rin si Deguito ng kabuuang $109 million.
Lalaking nahaharap sa 26 rape cases, arestado!
Gayunman, nilinaw ng abogado ni Deguito na si Atty. Demetrio Custodio na hindi makukulong ang kanyang kliyente, na pansamantala pa ring nakalalaya hanggang wala pang inilalabas na pinal na desisyon sa kaso.
Matatandaang nakapagpiyansa si Deguito at wala umanong expiration ang bail bond nito.
“Therefore our option of filing of filing a motion for consideration is still available. In the meantime and while that is pending, there will be no incarceration,” ani Custodio.
Hindi rin aniya maaaring pilitin si Deguito na ibalik ang nasabing halaga, dahil nai-turn over na umano ito sa bank account ni William Go.
Si Deguito ay dating branch manager ng RCBC nang masangkot sa cyber heist noong 2016.
Idinawit si Deguito sa Bangladesh Bank heist, at aabot sa $81 million ang ninakaw at nailipat sa iba’t ibang bank account, gamit ang apat na bogus na pangalan.
-Dhel Nazario
